სამსულიან ოჯახს გამოსახლების ეშინია

23 წლის ხათუნა კაკოშვილი, მცირეწლოვან შვილთან და დედასთან ერთად, ახალციხეში გურამიშვილის ქუჩაზე, სინაგოგაზე მიშენებულ შენობაში, 11 წელია ცხოვრობს. კაკოშვილები ამბობენ, რომ ბინის ქირის გადახდის საშულება არ ჰქონდათ და ამიტომ შენობაში თვითნებურად შესახლდნენ.

„ცხრა წელი ქირით ვიცხოვრეთ, თანხის გადახდა რომ ვეღარ შევძელით, აქ გადმოვედით. მეუღლეს უთხრეს, თავისუფალი ადგილია და დროებით თავი შეაფარეთ, ვიდრე ბინას იყიდითო. ახლა მეუღლეც გარდამეცვალა, სხვაგან წასასვლელი არ გვაქვს, თავს ძლივს ვირჩენთ, აქედან რომ გაგვიშვან, არ ვიცით რა გვეშველება“, – ამბობს ხათუნას დედა შორენა კაკოშვილი.

მისი თქმით, იმის გამო, რომ შენობის სახურავი დაზიანებულია და წვიმა ჩადის, 6 წლის შვილიშვილი დროებით ახლობელთან, სოფელში ჰყავს გაგზავნილი.

კაკოშვილები შენობაში 2005 წლიდან ცხოვრობენ.

„აქ რომ გადმოვედით, შენობა საცხოვრებლად უვარგისი იყო, ფანჯრებს მინებიც კი არ ქონდა. ახლა აქედან რომ გაგვასახლონ, თავიდან ყველაფერის გაკეთებას ვერ შევძლებთ, გვეშინია“, – ამბობს ხათუნა კაკოშვილი.

მორწმუნე ებრაელთა საზოგადოების თავმჯდომარე სიმონ ლევიშვილი ამბობს, რომ ამ ეტაპზე სინაგოგის რეაბილიტაცია არ იგეგმება და შესაბამისად, კაკოშვილებს დაკავებულ ფართს არავინ დაატოვებინებს: „აღნიშნული სინაგოგა ჯერ ჩვენზე გადმოცემული არ არის. წლების წინ იყო საუბარი, მაგრამ საუბრის დონეზევე დარჩა. თუ მისი რეაბილიტაცია გადაწყდება, მაშინ მოუწევთ შენობის დატოვება“. ამ შემთხვევაში მოუწევთ“.

გურამიშვილის ქუჩაზე მდებარე სინაგოგა 1902 წლით თარიღდება. ამ შენობაში წლების განმავლობაში კრივის სავარჯიშო დარბაზი იყო მოწყობილი, თუმცა სამი წელია უფუნქციოდაა დარჩენილი. სიმონ ლევიშვილის განმარტებით, სინაგოგას დამხმარე შენობა გასული საუკუნის 70–იან წლებში მიაშენეს.

სინაგოგა კულტურული მემკვიდრეობის ძეგლთა ნუსხაშია. მის რესტავრაციას ამ ეტაპზე არც სახელმწიფო გეგმავს.

„ჯერ სახელმწიფოს მისი რესტავრაცია არ გადაუწვეტია. ყოველ შემთხვევისთვის ჩვენს სამსახურში ამის შესახებ ინფრომაცია არ გვაქვს. როგორც წესი რესტავრაციისას ძეგლს თავდაპირველი სახე უნდა დაუბრუნდეს, გასარკვევია სინაგოგას ამ შენობასთან ერთად მიენიჭა თუ არა ძეგლის სტატუსი. თუ ერთ საკადასტრო ერთეულშია, შეიძლება ერთად ქონდეს მინიჭებული. ეს ყველაფერი სათანადო პროექტირების შემდეგ გაირკვევა, ამის შემდეგ ძეგლი მიიღებს პირვანდელ სახეს“, – განმარტავენ კულტურული მემკვიდრეობის დაცვის ეროვნული სააგენტოს აღრიცხვა დოკუმენტირების სამსახურში.

კაკოშვილები სოციალურ დახმარებას იღებენ, გარდა ამისა მათი გვარი ახალციხის მერიის იმ ბაზაშია დაფიქსირებული, რომლებსაც საკუთარი საცხოვრებელი სახლი არ აქვთ. მერიის საორგანიზაციო სამსახურში აცხადებენ, რომ კაკოშვილებს საჭიროების შემთხვევაში ალტერნატიულ ფართს მოუძებნიან, ან კიდევ იმ საცხოვრებელ სახლში შეასახლებენ, რომლის აშენებასაც მერია გეგმავს, თუმცა როდის და კონკრეტულად სად, ეს გადაწყვეტილი ამ ეტაპზე არ არის.

[თინათინ ზაზაძე, ახალციხე]