პროკურატურა ახალციხეში მომხდარზე: მამაკაცმა სიდედრს ზურგზე ელექტროშოკი მიადო, ცოლი კი პისტოლეტით დაჭრა

როგორც უწყების მიერ გავრცელებულ განცხადებაში ვკითხულობთ, პროკურატურამ ოჯახის წევრის მიმართ ძალადობისა და ჯანმრთელობის განზრახ ნაკლებად მძიმე ხარისხის დაზიანების ფაქტზე ა.გ.-ს ბრალდება წარუდგინა საქართველოს სისხლის სამართლის კოდექსის 126 პრიმა მუხლის პირველი ნაწილით და 11 პრიმა 118-ე მუხლის პირველი ნაწილით.

გამოძიებით დადგინდა, რომ 2017 წლის 25 ივლისს, დაახლოებით 12 საათზე, ქ. ახალციხეში არაფხიზელ მდგომარეობაში მყოფმა ა.გ.-მ ყოფილი მეუღლის დედას ლ.რ.-ს, მისივე საცხოვრებელი სახლის ეზოში ზურგის არეში ელექტროშოკი მიადო, აეროზოლი შეასხურა და ხელის კვრით წააქცია, რის შედეგადაც მიაყენა სხეულის დაზიანება, შემდეგ კი ყოფილ მეუღლეს ო.რ.-ს ტრავმატული პისტოლეტის თავის არეში დარტყმით და რამდენიმე გასროლით სხეულის სხვადასხვა ადგილებში მიაყენა მრავლობითი დაზიანებები, რის შემდეგაც შემთხვევის ადგილიდან მიიმალა. ო.რ. სასწრაფო სამედიცინო დახმარების აღმოჩენის მიზნით, გადაყვანილი იქნა საავადმყოფოში.

შეგახსენებთ, რომ შემთხვევა 25 ივლისს მოხდა. ქმარმა ცოლს, 31 წლის ქალს, ცეცხლსასროლი იარაღით მრავლობითი ჭრილობები მიაყენა. იგი სამართალდამცავებმა ცხელ კვალზე დააკავეს. დაჭრილს ახალციხის რეფერალურ ჰოსპიტალში ოპერაცია ჩაუტარდა. იგი ამ დრომდე ექიმების დაკვირვების ქვეშაა. დაზარალებულს უფასო იურიდიულ დახმარებას გაუწევს ‘საქართველოს დემოკრატიული ინიციატივა’. ორგანიზაციის ადვოკატი უკვე შეხვდა დაზარალებულს, რომელიც ამბობს, რომ ეს ძალადობის პირველი შემთხვევა არ არის.

პროკურატურის შუამდგომლობის საფუძველზე, დღეს, 27 ივლისს, ა.გ.-ს აღკვეთის ღონისძიების სახით პატიმრობა შეეფარდა.

[ნინო ნარიმანიშვილი, ახალციხე]