ქალი, რომელიც ქმარმა დაჭრა, ამბობს, რომ ეს ძალადობის პირველი შემთხვევა არ იყო

ქალს, რომელიც ქმარმა ცეცხლსასროლი იარაღით დაჭრა, ‘საქართველოს დემოკრატიული ინიციატივა’ იურიდიულ დახმარებას გაუწევს. ადვოკატი უკვე შეხვდა დაზარალებულს, საუბარში კი გაირკვა, რომ ეს ძალადობის პირველი შემთხვევა არ არის, ამის შესახებ შსს–მაც იცოდა, თუმცა, რეაგირება არ მოუხდენია.

დაზარალებულს, რომელიც ჯერ კიდევ ახალციხის რეფერალურ ჰოსპიტალში, ექიმების დაკვირვების ქვეშაა, ორგანიზაციის იურისტი ედუარდ მარიკაშვილი დღეს, დაახლოებით ორი საათის განმავლობაში ესაუბრებოდა.

მისი განმარტებით, ორგანიზაცია მზადაა ოჯახში ძალადობის მსხვერპლს უსასყიდლოდ გაუწიოს იურიდიული დახმარება როგორც სისხლის სამართლის, ისე მეუღლესთან განქორწინებისა და ქონებრივ საკითხებში: „ჯანმრთელობის მდგომარეობის გამოსწორებას დაველოდებით და შემდეგ შევთანხმდებით ბავშვების საკითხზე, რომ დედასთან დარჩნენ, ქონებრივ დავაზე და ასე შემდეგ“.

როგორს ადვოკატმა დაზარალებულთან საუბარში გაარკვია, ეს პირველი შემთხვევა არ არის და 31 წლის ქალი ფიზიკური და ფსიქოლოგიური ძალადობის მსხვერპლი ადრეც იყო. ფსიქოლოგიურ ძალადობას იგი ამჯერადაც განიცდიდა.

„ძალადობის შესახებ პოლიციაში თავიდან არ აცხადებდა, რადგან მოკვლით ემუქრებოდნენ, ქმარი ეუბნეოდა, რომ ყელს გამოჭრიდა. ეს არც პირველი შემთხვევაა და როგორც გავარკვიე, იკვეთება პოლიციის უმოქმედობაც. ერთ–ერთ ძალადობრივ შემთხვევაზე, როდესაც ქმარმა „ატვიორკით“ სახე დაუსახიჩრა, თავად პოლიციელებმა გამოიძახეს სასწრაფო, თუმცა გამოძიება არ დაიწყეს. ვფიქრობ რომ ამან მისცა საბაბი დანაშაული კიდევ ჩაედინა“, – განმარტავს ედუარდ მარიკაშვილი.

შინაგან საქმეთა სამინისტროში ამ ფაქტს უარყოფენ და ამბობენ, რომ ამ ოჯახიდან შეტყობინება აქამდე არასდროს შესულა. ძალადობის შესახებ ცნობა პირველად გუშინ, 25 ივლისს შევიდა და ბრალდებული ცხელ კვალზე დააკავეს.

შეგახსენებთ, რომ შემთხვევა ახალციხეში გუშინ, 25 ივლისს მოხდა. ქმარმა ცოლი ცეცხლსასროლი იარაღით დაჭრა. შინაგან საქმეთა სამინისტრომ ბრალდებული ცხელ კვალზე დააკავა.

საქმეზე ძიება სისხლის სამართლის კოდექსის ორი მუხლით დაიწყო: 11 პრიმა – 117–ე, – ოჯახის ერთი წევრის მიერ მეორის მიმართ ჯანმრთელობის განზრახ მძიმე დაზიანება და 236–ე, რაც ცეცხლსასროლი იარაღის უკანონო შეძენა–შენახვა–ტარება.

ბრალდებული წინასწარი დაკავების იზოლატორშია მოთავსებული. დღეს ახალციხის რაიონულ სასამართლოში მისთვის აღკვეთის ღონისძიების შეფარდების შესახებ განცხადება არ შესულა. ამ საქმეზე სასამართლო სავარაუდოდ ხვალ იმსჯელებს.

[ლუბა გიორგაძე, ახალციხე]