ცოლის დაჭრაში მსჯავრდებულის განაჩენი სააპელაციოში გაასაჩივრეს

„არ იყო სწორი გადაწყვეტილება და იმედი გვაქვს, სააპელაციო სასამართლო ჩვენს მოთხოვნებს გაითვალისწინებს“, – ამბობს ა.გ.–ს ადვოკატი კახა მათოშვილი.

მიიღებს თუ არა სააპელაციო სასამართლო სარჩელს განხილვაში, ჯერ ცნობილი არ არის.

ახალციხეში მცხოვრებ ა.გ.–ს, რომელსაც პროკურატურა ცოლის დაჭრასა და სიდედრის ელექტროშოკით წამებაში სდებდა ბრალს, ახალციხის რაიონულმა სასამართლომ, განაჩენი 1 დეკემბერს გამოუტანა. მოსამართლემ ბრალდებულს ორწლიანი პატიმრობა მიუსაჯა. ცოლის დაჭრაში ბრალდებულის საქმეს სასამართლო სამი თვის განმავლობაში იხილავდა.

ვიდრე პროცესები დასრულდებოდა, ა.გ.–ს ადვოკატი პროკურატურისაგან საპროცესო შეთანხმების გაფორმებას ითხოვდა, თუმცა უარი მიიღო.
შეგახსენებთ, რომ შემთხვევა ახალციხეში 2017 წლის 25 ივლისს მოხდა. ქმარმა ცოლი დაჭრა, სიდედრს კი ზურგის არეში ელექტროშოკი მიადო, აეროზოლი შეასხურა და ხელის კვრით წააქცია, რის შედეგადაც მიაყენა სხეულის დაზიანება. მომხდარზე ძიება სისხლის სამართლის კოდექსის 126 პრიმა მუხლის პირველი ნაწილითა და 11 პრიმა 118-ე მუხლის ასევე პირველი ნაწილით მიმდინარეობდა.

[ლუბა გიორგაძე, ახალციხე]