ქმრის მიერ დაჭრილი ცოლი ჯერ ისევ საავადმყოფოში რჩება

როგორც ახალციხის რეფერეალურ ჰოსპიტალში „სამხრეთის კარიბჭეს“ განუცხადეს, 31 წლის ქალის მდგომარეობა სტაბილურია: „ძირითადად მთელს სხეულზე დაჟეჟილობები აქვს, ფეხზე აქვს მიყენებული ცეცხლსასროლი იარაღით ჭრილობები. ახლა სტაბილურია მისი მდგომარეობა და სავადმყოფოში რჩება“.

როდის გაწერენ დაჭრილს ბინაზე, ამ ეტაპზე უცნობია.

შეგახსენებთ, რომ გუშინ, 25 ივლისს, ახალციხეში ქმარმა ცოლს ცეცხლსასროლი იარაღით მრავლობითი ჭრილობები მიაყენა. როგორც ოჯახის ახლობლები აცხადებენ, ბოლო დროს ცოლ–ქმარი ერთად აღარ ცხოვრობდნენ.

შინაგან საქმეთა სამინისტროს ინფორმაციით, შუახნის მამაკაცი სამართალდამცველებმა ცხელ კვალზე, მომხდარიდან მალევე დააკავეს. ძიება სისხლის სამართლის კოდექსის ორი მუხლით დაიწყო: 11 პრიმა – 117–ე, რაც ოჯახის ერთი წევრის მიერ მეორის მიმართ ჯანმრთელობის განზრახ მძიმე დაზიანებას გულისხმობს და 236–ე, რაც ცეცხლსასროლი აირაღის უკანონო შეძენა–შენახვა–ტარებას გულისხმობს.

დაკავებული ამჟამად დროებითი მოთავსების იზოლატორში იმყოფება.

ამ დრომდე უცნობია როდის იმსჯელებს ახალციხის რაიონული სასამართლო ბრალდებულისათვის აღკვეთის ღონისძიების შეფარდებაზე. სასამართლოში ჯერ განცხადება არ შესულა.

[sknews.ge]