ასპინძაში ქმარმა ცოლი მოკლა

შემთხვევა გუშინ, 8 აპრილს, გვიან ღამით მოხდა. მამაკაცმა ცოლს სასიკვდილო ჭრილობები დანით მიაყენა. გარდაცვლილს ორი არასრულწლოვანი შვილი დარჩა.

შინაგან საქმეთა სამინისტროს ინფორმაციით, მკვლელობაში ბრალდებული სამართალდამცველებმა ცხელ კვალზე დააკავეს. გამოძიება სისხლის სამართლის კოდექსის 11–108 –ე მუხლით მიმდინარეობს, რაც ოჯახში ძალადობის ნიადგზე განზრახ მკვლელობას გულისხმობს.

ადგილობრივების ინფორმაციით, მკვლელობა ეჭვიანობის ნიადაგზე მოხდა. მამაკაცი ცოლის მკვლელობის შემდეგ თავს დაესხა შუახნის მამაკაცს, – იმ ახალგაზრდის მამას, რომელზეც ეჭვიანობდა. მას ჭრილობა თავის არეში ბლაგვი საგნით აქვს მიყენებული.

„ცოლი მოკლა და შემდეგ მის მოსაკლავად წავიდა, მაგრამ ბიჭი სახლში არ დახვდა და 65 წლის მამა დაჭრა“, – ამბობენ ადგილობრივები.

დაჭრილი, 65 წლის მამაკაცის მდგომარეობა სტაბილურია. იგი თბილისის ერთ–ერთ სამედიცინო დაწესებულებაში მკურნალობს.

დაჭრის ფაქტზე გამოძიება სისხლის სამართლის კოდექსის 117–ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.

[ლუბა გიორგაძე, ასპინძა]