ქალი, რომელიც ქმარმა დაჭრა, შვილების დასაბრუნებლად სასამართლო დავაზე უარს ამბობს

როგორც დაჭრილი ქალის ადვოკატი ედვარდ მარიკაშვილი აცხადებს, სამოქალაქო დავის წამოსაწყებად, რომლის მიხედვითაც ქალი ორი მცირეწლოვანი შვილის დაბრუნებას აპირებდა, სარჩელი უკვე მზად იყო და სასამართლოში რეგისტრაცია სჭირდებოდა. თუმცა, დაზარალებულმა დავის წამოწყებაზე უარი განაცხადა.

მარიკაშვილის თქმით, მისი დაცვის ქვეშ მყოფს მიზეზები არ განუმარტავს. ადვოკატი ფიქრობს, რომ ქალზე ქმრის ახლობლების მხრიდან ზეწოლა განხორციელდა: „ორი შვილი ჰყავს და არცერთს არ ანახებდნენ, ამიტომ უნდოდა ორივეზე მეურვეობა აეღო და ყველაფრისათვის მზად იყო. ბოლო მომენტში კი, როდესაც სარჩელი უნდა დაგვერეგისტრირებინა, უარი თქვა. ეს თავისთავად გვაფიქრებინებს, რომ მასზე ზეწოლა განხორციელდა, სხვა შემთხვევაში აზრს არ შეიცვლიდა“.

მისივე თქმით, დაჭრილ ქალს ზეწოლის შედეგად დააწერინეს და ნოტარიულად დაამოწმებინეს შერიგების შესახებ განცხადებებიც, რომელიც სასმართლოს და პროკურატურას საპროცესო შეთანხმების მოთხოვნისას გადაუგზავნეს.

„საქართველოში ასეთი ტენდენციაა, ვითომ მსხვერპლი ურიგდება მოძალადეს, თუმცა სინამდვილეში ასე სულაც არ არის. არცერთი ქალის საბოლოო ნება ეს არ არის და ყოველთვის ფსიქოლოგიური თუ ფიზიკური ზეგავლენაა“, – ამბობს მარიკაშვილი.

ქალის დაჭრაში ბრალდებულის ადვოკატებმა, მართლაც წარადგინეს ორი განცხადება, ერთი სასამართლო განხილვების დროს, მეორე ბოლო პერიოდში, როდესაც დაცვის მხარემ პროკურატურას საპროცესო შეთანხმების გაფორმებაზე მიმართა.

ადვოკატები აცხადებენ, რომ შეიგების შესახებ ნოტარიულად დამოწმებული განცხადებები მათ ბრალდებულის ახლობლებმა გადასცეს, თუმცა ისინი, დაზარალებულზე ზეწოლას გამორიცხავენ.

„დაზარალებული მიდის ნოტარიუსთან თავისი ნებით, ყოველგვარი ძალადობის გარეშე, იქვე წერს განცხადებას და ნოტარიულად ამოწმებინებს, ისე, რომ ამას თავად ნოტარიუსიც უყურებს, ამიტომ აქ ყველანაირი ზეწოლა და მსგავსი რაღაცეები გამორიცხულია“,–ამბობს ბრალდებულის ადვოკატი კახა მათოშვილი.

მიუხედავად შერიგების შესახებ წარდგენილი განცხადებებისა, პროკურატურამ ქალის დაჭრაში ბრალდებულს საპროცესო შეთანხმება არ გაუფორმა. „საქართველოს დემოკრატიული ინიციატივას“ იურისტი ედვარდ მარიკაშვილი, რომელიც ასევე დაზარალებული ქალის უფლებებს იცავს, იმედოვნებს, რომ შერიგების შესახებ წარდგენილ განცხადებებს, არც სასამართლო გაითვალისწინებს და ბრალდებულს კანონით გათვალისწინებულ სასჯელს დააკისრებს.

შეგახსენებთ, რომ ახალციხეში ქმარმა ცოლი 25 ივლისს დაჭრა. გამოძიების ინფორმაციით, არაფხიზელ მდგომარეობაში მყოფმა ა.გ.-მ ყოფილი მეუღლის დედას ლ.რ.-ს, მისივე საცხოვრებელი სახლის ეზოში ზურგის არეში ელექტროშოკი მიადო, აეროზოლი შეასხურა და ხელის კვრით წააქცია, რის შედეგადაც მიაყენა სხეულის დაზიანება. მომხდარზე ძიება სისხლის სამართლის კოდექსის 126 პრიმა მუხლის პირველი ნაწილითა და 11 პრიმა 118-ე მუხლის ასევე პირველი ნაწილით მიმდინარეობს.

[ლუბა გიორგაძე, ახალციხე]