59%-ისთვის მიუღებელია ქალაქისა და თემის მუნიციპალიტეტების გაერთიანება – NDI

ქალაქისა და თემის მუნიციპალიტეტების გაერთიანება, რაც გულისხმობს, რომ ორივეს ერთი და იგივე უწყება უხელმძღვანელებს, მისაღები მხოლოდ 16%–სთვისაა.

ზოგადად, ამ იდეის შესახებ სმენია გამოკითხულთა 52%–ს, 44%–მა კი არ იცის.

გამოკითხულთა 45% მიიჩნევს, რომ ამ ცვლილებას ქვეყანაზე უარყოფითი გავლენა ექნება. მხოლოდ 11% ფიქრობს, რომ ცვლილებას დადებითი შედეგი ექნება.



შეგახსენებთ, მთავრობა 12 თვითმმართველი ქალაქიდან შვიდისთვის სტატუსის გაუქმებას ფიქრობს. ეს ქალაქებია: ოზურგეთი, გორი, ამბროლაური, ახალციხე, თელავი და მცხეთა. მიზეზად ხარჯების დაზოგვას ასახელებენ. თვითმმართველი ქალაქების გაუქმებასა და საარჩევნო კოდექსში შესატან ცვლილებებს პრეზიდენტმა ვეტო დაადო. საპარლამენტო უმრავლესობა ვეტოს დასაძლევად დღეს იკრიბება.

საზოგადოებრივი აზრის კვლევა, ეროვნულ დემოკრატიული ინსტიტუტის (NDI) დაკვეთით, CRRC-საქართველომ დიდი ბრიტანეთის მთავრობის, UK aid-ის დაფინანსებით ჩაატარა. კვლევის საველე სამუშაოები 18 ივნისი -9 ივლისის პერიოდში მიმდინარეობდა საქართველოს მასშტაბით (ოკუპირებული ტერიტორიების გარდა). პირისპირ ინტერვიუს სახით, წარმომადგენლობითი შერჩევით 2 261 პირი გამოიკითხა. კვლევაში საშუალო ცდომილების ზღვარი არის +/- 2.2%.

საზოგადოებრივი აზრის კვლევის შედეგების პირველი ნაწილი დღეს, 26 ივლისს, გამოქვეყნდა.

[sknews.ge]