ნეპოტიზმი ადგილობრივი მთავრობაში – 46%, პროფესიონალიზმის ნაკლებობა – 58% – NDI

ადგილობრივი მთავრობის მუშაობას დადებითად ეროვნულ-დემოკრატიული ინსტიტუტის (NDI) მიერ გამოკითხულთა მხოლოდ 16% აფასებს, 52% ფიქრობს, რომ მთავრობის მუშაობა საშუალოა, 28%–ის აზრით კი ადგილობრივი მთავრობა ცუდად მუშაობს.

პატარა ქალაქებში (მათ შორის, ახალციხეში), ადგილობრივი მთავრობის მუშაობას კარგად მხოლოდ 15%, სოფლად 20%, უმცირესობათა დასახლებაში კი 29% აფასებს.

ამასთან, გამოკითხულთა დიდი ნაწილი ფიქრობს, რომ ადგილობრივ ხელისუფლებაში პროფესიონალიზმის ნაკლებობა და ნეპოტიზმია, – 58% ფიქრობს, რომ პროფესიონალიზმის ნაკლებობაა, 46%–ს მიაჩნია, რომ ნეპოტიზმის პრობლემა არსებობს. გარდა ამისა, 35% ამბობს, რომ ადგილობრივ ხელისუფლებაში კორუფციაა, თუმცა, 38% ამ მოსაზრებას არ ეთანხმება.



ამავე გამოკითხვის მიხედვით, საკრებულოს მუშაობით კმაყოფილია გამოკითხულთა 21%, მერიის მუშაობით კი გამოკითხულთა 20%. ამასთანავე, გამოკითხულთა 86%–ს, ბოლო ერთი წლის განმავლობაში, შეხება არ ჰქონია საკრებულოსთან, მერიასთან შეხება არ ჰქონია გამოკითხულთა 80%–ს.




საზოგადოებრივი აზრის კვლევა, ეროვნულ დემოკრატიული ინსტიტუტის (NDI) დაკვეთით, CRRC-საქართველომ დიდი ბრიტანეთის მთავრობის, UK aid-ის დაფინანსებით ჩაატარა. კვლევის საველე სამუშაოები 18 ივნისი -9 ივლისის პერიოდში მიმდინარეობდა საქართველოს მასშტაბით (ოკუპირებული ტერიტორიების გარდა). პირისპირ ინტერვიუს სახით, წარმომადგენლობითი შერჩევით 2 261 პირი გამოიკითხა. კვლევაში საშუალო ცდომილების ზღვარი არის +/- 2.2%.

საზოგადოებრივი აზრის კვლევის შედეგების პირველი ნაწილი დღეს, 26 ივლისს, გამოქვეყნდა.

[sknews.ge]