ურაველში მომხდარ დაპირისპირებას „ქართული ოცნება“ ეხმაურება

პარტიამ "ქართული ოცნება – დემოკრატიული საქართველო", ურაველში ფიზიკური დაპირისპირების შესახებ განცხადება დღეს, 17 ივლისს სოციალური ქსელის, ფეისბუქის საშუალებით გაავრცელა.

"გვსურს, გამოვეხმაუროთ ახალციხის მუნიციპალიტეტის სოფელ ურაველში მომხდარი ფიზიკური დაპირისპირების ფაქტს. პარტია "ქართული ოცნება-დემოკრატიული საქართველო" მომხდარის გამო, შეშფოთებას გამოთქვამს და ვინც უნდა იყოს დაპირისპირების მხარე, ძალადობის ყოველგვარ ფაქტს კატეგორიულად გმობს.
მოვუწოდებთ სამართალდამცავ ორგანოებს, სამართალდარღვევის ფაქტზე დროული რეაგირება მოახდინონ. ასევე, მოვუწოდებთ პოლიტიკურ პარტიებს, მსგავსი ფაქტები პოლიტიკური მიზნებისთვის არ გამოიყენონ" – ნათქვამია განცხადებაში.

შეგახსენებთ, რომ შემთხვევა გუშინ, 16 ივლისს მოხდა. ახალციხეში, სოფელ ურავლის ტყეში "ნაციონალური მოძრაობის" ყოფილი კოორდინატორი, ბეგლარ კაპანაძე მამასთან და შვილთან ერთად სცემეს. მისი თქმით, თვითმმართველობის ყოფილმა და მოქმედმა თანამშრომლებმა, გზა სამი მანქანით გადაუკეტეს, შემდეგ კი სცემეს. კაპანაძის განმარტებით, ერთ–ერთ მათგანთან წარსულში, პოლიტიკური ნიშნით დაპირისპირება ჰქონდა.

[sknews.ge]