ისტორიის გამოცდაზე ერთი აბიტურიენტი არ დაუშვეს

დღეს, 17 ივლისს, ისტორიის გამოცდაზე, დაგვიანების გამო, ერთი აბიტურიენტი არ დაუშვეს. როგორც ახალციხის საგამოცდო ცენტრის კოორდინატორი გელა ინასარიძე ამბობს, გოგონა 10 წუთის დაგვიანებით გამოცხადდა, რის გამოც, დასწრებაზე უარი უთხრეს – "ერთი წუთიც რომ დაიგვიანონ არ შეიძლება გამოცდაზე შეშვება“.

აბიტურიენტების განმარტებით, გამოცდა რამდენიმე ნაწილისგან შესდგებოდა, შედარებით რთული კი მისი ტესტური ნაწილი იყო.

"გამოცდაში მსოფლიოს და საქართველოს ისტორიიდან თანანაბრად იყო მასალები შესული. მხოლოდ ტესტები აღმოჩნდა შედარებით რთული, რადგან ოთხი სავარაუდო პასუხიდან ორი ერთმანეთს ჰგავდა და ამან ცოტა დამაბნია", – ამბობს ზვიად დიასამიძე.

გამოცდის ორივე სესიაზე რეგისტრირებული 359 აბიტურიენტიდან 11 მათგანი არ გამოცხადდა.

ხვალ, 18 ივლისს, გამოცდებს პირველ სესიაზე პედაგოგები პროფესიულ საგანში ჩააბარებენ, ხოლო მეორე სესიაზე აბიტურიენტები ტესტს ბიოლოგიაში დაწერენ.

[მარიამ ბარძიმაძე, ახალციხე]