”ევროსაბჭოს” წარმომადგენლები უმცირესობებისა და სომხური ენის სტატუსის საკითხით დაინტერესდნენ

შეხვედრა არასამთავრობო ორგანაზაცია ”ტოლერანტის” ოფისში გაიმართა. დისკუსიას ”ტოლერანტის” წევრები, ახალციხის არასამთავრობო ორგანიზაცია ”ახალგაზრდული ცენტრის” დირექტორი მაკა სუდაძე და რეპატრიანტების უხუცესთა საბჭოს წარმომადგენელი სარვარ საფაროვი ესწრებოდნენ.

”ჩვენთვის დიდი პატივია, რომ აქტუალურ საკითხებთან დაკავშირებით მათ არასამთავრობო ორგანიზაციების აზრი აინტერესებდათ. რეპატრირებული მესხებისა და ენის სტატუსის საკითხებით დაინტერესდნენ”,- ამბობს ”ტოლერანტის” თავმჯდომარე ცირა მესხიშვილი.

მისივე თქმით, წარმომადგენლები დროში შეზღუდულები იყვნენ და ყველა თემაზე საუბარი ვერ მოხერხდა: ”ამ ორ თემასთან დაკავშირებით ჩვენი გამოცდილება გავუზიარეთ. ძალიან კმაყოფილი და ინფორმაციით დატვირთულები წავიდნენ. ევროსაბჭოს მონიტორინგის კომიტეტის წარმომადგენლები აღნიშნულ თემებზე არ საუბრობდნენ, ისინი კითხვებს სვამდნენ. მიიღებენ ინფორმაციას და მოგვიანებით სახელმწიფოს ანგარიშს წარუდგენენ”.

არასამთავრობო სექტორის შემდეგ ევროსაბჭოს წარმომადგენლები ადგილობრივი ხელისუფლების წევრებს შეხვდნენ. მათ დაგეგმილი ჰქონდათ ახალციხის ციხის მონახულებაც. ახალციხის შემდეგ ევროსაბჭოს მონიტორინგის კომისია ახალქალაქში გაემგზავრება. როგორც ცნობილია, დაგეგმილია შეხვედრები არასამთავრობო სექტორსა და სახალხო დამცველის წარმომადგენლობასთან.

[ნინო ზედგინიძე, ახალციხე]