აბასთუმნის ყოფილი რწმუნებული დაკავებულია

აბასთუმნის მკვიდრი ანტონ მერაბიშვილი საქართველოს ფინანსთა სამინისტროს საგამოძიებო სამსახურის თანამშრომლებმა დააკავეს. მას აღკვეთი ღონისძიება ახალციხის რაიონულ სასამართლოში დღეს შეეფარდა.

„გირაო 40 ათასი ლარის ოდენობით შეეფარდა, ბრალი სისხლის სამართლის კოდექსის 182-ე მუხლის მეორე ნაწილის ა და ბ პუნქტებით ედება“, - ამბობს მოსამართლე გია ბერაია.

ახალციხის რაიონული სასამართლოს მენეჯერის ნინო ჩიგოგას განმარტებით, აღნიშნული მუხლი მითვისება-გაფლანგვას გულისხმობს: „აქ საქმე თანხის მითვისებაზეა და ის ადიგენის მუნიციპალიტეტის სოფლებში ტენდერით გაკეთებულ გარე განათებებს ეხება“.

ადიგენის მუნიციპალიტეტის გამგებელმა სიმონ პარუნაშვილმა მერაბიშვილის ბრალდების შესახებ არაფერი იცის: „რომელ წელს დამონტაჟებულ განათებებს ედავებიან, წარმოდგენა არ მაქვს“.

პარუნაშვილი ადიგენის მუნიციპალიტეტის გამგებლის პოსტზე 2009 წლიდან მუშაობს და ამბობს, რომ განათებები მის გამგებლად დანიშვნამდეც იყო გაკეთებული და მას შემდეგაც გაკეთდა. მისივე თქმით, მერაბიშვილი აბასთუმნის რწმუნებულად ორი წელია აღარ მუშაობს: „პირადი განცხადების საფუძველზე მე გავათავისუფლე“.

მერაბიშვილს პატიმრობიდან გირაოს გადახდის შემდეგ გაათავისუფლებენ.

[თამუნა უჩიძე, ახალციხე]