ვარძიის ქუჩაზე ცხაურების ხმაური აწუხებთ

ვარძიის ცენტრალურ ქუჩაზე ხშირად ნახავთ ღია სანიაღვრე არხებს, რომლებსაც ცხაურები ახდილი აქვს. ადგილობრივები აცხადებენ, რომ რკინის კონსტრუქცია, რომელზეც მანქანები დადიან ხმას გამოცემს, რის გამოც შეწუხებულები არიან.

"ზაფხულია, ფანჯრები სულ ღია გვაქვს ისეთი ხმაურია ვერ ვიძინებთ", – ამბობს ვარძიის ქუჩაზე მცხოვრები ლამზირა ლომიძე.

მისივე თქმით, ადგილობრივი ხელისუფლებისგან ცხაურების დამაგრების პირობა ჯერ კიდევ არჩევნებადე მიიღეს, თუმცა უშედეგოდ.

"მეზობელ ქუჩებზე ნაწილი შეცვალეს, ნაწილი დაამაგრეს, ჩვენთან დაპირების მიუხედავად არაფერი შეცვლილა, ამიტომ იძულებულები გავხდით აგვეხადა და ღია დაგვეტოვებინა", – აცხადებენ ადგილობრივები.

ახალციხის მერიაში ამბობენ, რომ ვარძიის ქუჩაზე ახალი ცხაურების გაკეთებას ან არსებულის დამაგრებას ამ ეტაპზე არ გეგმავენ.

[თინათინ ზაზაძე, ახალციხე]