როდის დაიწყება საზაფხულო არდადეგები ახალციხის ბაღებში

ქალაქ ახალციხის სკოლამდელი აღზრდის დაწესებულებათა გაერთიანების დირექტორის ნანა ბერიძის ინფორმაციით, არდადეგები სავარაუდოდ ერთ თვეს გასტანს: „1–ლი აგვისტოდან, სავარაუდოდ, თვის ბოლომდე დავისვენებთ“.

ახალციხის რვა საბავშვო ბაღში 1350 აღსაზრდელი და 213 პედაგოგია. სექტემბრიდან ბაღებს კიდევ 300 აღსაზრდელი დაემატება. აღსაზრდელთა რეგისტრაცია, რომელიც 1 მარტიდან მიმდინარეობდა, უკვე დასრულდა.

„400 – მდე განაცხადი იყო შემოსული, თუმცა ყველა ვერ ჩაირიცხა. მხოლოდ 300 აღსაზრდელი მივიღეთ“,– ამბობს ნანა ბერიძე.
რაც შეეხება ახალციხის სოფლების ბაღებს, აქ სწავლა არ შეწყდება. დაწესებულებათა გაერთიანებაში ამბობენ, რომ ზაფხულში პედაგოგები მონაცვლეობით დაისვენებენ.

„ივლისში მასწავლებელთა ნახევარი ჯგუფი ისვენებს, აგვისტოში კი მეორე ნახევარი. ამ პერიოდის განმავლობაში ისინი შერეულ ჯგუფებში მუშაობენ, ბაღი არ იკეტება“,– ამბობს ახალციხის თემის სკოლამდელი აღზრდის დაწესებულებათა გაერთიანების დირექტორი ლელა ოქრომელიძე.

რაც შეეხება აღსაზრდელთა რეგისტრაციას, სოფლების ბაღებში განაცხადების მიღება მუდმივ რეჟიმში მიმდინარეობს.

„ჩვენთან მთელი წლის განმავლობაში შემოდის განაცხადები და როცა იქნება განაცხადი შემოსული შემდეგ თვის დასაწყისიდან ვრიცხავთ აღსაზრდელს“,– ამბობს ოქრომელიძე.

ახალციხის სოფლებში სულ 14 ბაღია.

[მარიამ ბარძიმაძე, ახალციხე]