ახალციხეში საქველმოქმედო კონცერტმა ანშლაგით ჩაიარა

ღონისძიების პირველი ნაწილი ადგილობრივ ქორეოგრაფიულ ანსამბლებს: „მესხეთს“ „ სამცხეს“, „ლომსიას“, „ახალციხეს“, „მესხ ფრთოსანს“,ასევე ფოლკლორულ ანსამბლ „მესხეთს“ და სტუდია პალიტრას დაეთმო. მეორე ნაწილში კი ქართული შოუ–ბიზნესის წარმომადგენლბმა იმღერეს. მათ საკუთარი შემოქმედებიდან ორ–ორი სიმღერა შეასრულეს.

„არ არსებობს უფრო კარგი მაყურებელი და უფრო კარგი მსმენელი, ვიდრე აქაა. როდესაც ატარებ საქველმოქმედო კონცერტს, მიდიხარ საღამოზე იქ თანხის არც ერთ პროცენტს არ იტოვებ შენთვის. ეს იყო ურთიერთშეთანხმებული საღამო, ყოველთვის მზად ვარ ასეთი საღამოებისათვის“,– ამბობს პოეტი და ღონისძიების მეორე ნაწილის წამყვანი ნანა ცინცაძე.

ქორეოგრაფიულმა ანსამბლებმა „ლომსიამ“ და „სამცხემ“, ასევე ახალციხისა და ტაო–კლარჯეთის ეპარქიამ დავით გასიტაშვილს დასახმარებლად თანხა გადაურიცხეს.სულ თანხის რა ოდენობა შეიკრიბა, ჯერ უცნობია.

საქველმოქმედო კონცერტს ორგანიზება დავით გასიტაშვილის მეგობრებმა გაუწიეს.

„კმაყოფილ ვარ რომ საღამო შედგა. ეს საღამო ჩვენი მიზანი იყო. დაახლოებით 3 კვირა ვემზადებოდით და მოლაპარაკებებს ვაწარმოებდით, რომ აქამდე მოვსულიყავით“,–გვითხრა ერთ–ერთმა ორგანიზატორმა ნიკა კვახაჯელიძემ.

შეგახსენებთ, რომ 24 წლის დავით გასიტაშვილი 7 მაისს სოფელ რუსთვათან მომხდარი ავტოავარიის შედეგად დაშავდა. მას გადაუდებელი სამედიცინო დახმარება სჭირდება, რისთვისაც ოჯახს შესაბამისი თანხები არ გააჩნია.





[მარიამ ბარძიმაძე, ახალციხე]