საქველმოქმედო აქცია მამუკა გვირჯიშვილის დასახმარებლად

მამუკა გვირჯიშვილის დასახმარებლად საქველმოქმედო ღონისძიება მესხეთის სახელმწიფო დრამატული თეატრში 18:00 საათზეა დაგეგმილი. მასში მონაწილეობას ქართული ესტრადის წარმომადგენლები მიიღებენ. ვერიკო ტურაშვილი, ნინო ძოწენიძე, ჯგუფი „სეიშენი“, გიორგი დათიაშვილი, „ძვალი“, „კაბუ“, „კენტი“, „მასტერი“ და სხვა ქართველი მომღერლები კონცერტს მამუკა გვირჯიშვილის დასახმარებლად გამართავენ.

„მამუკას ბავშვობიდან ვიცნობ, მისი მეგობრები დამიკავშირდნენ და მითხრეს, რომ კონცერტის გაკეთება უნდოდათ და ჩემი დახმარება სჭირდებოდათ. მე რა თქმა უნდა დავთანხმდი, ამ აქციაში ჩართული არიან მისი მეგობრები, სტუდენტები, ახლობლები და ყველა ამ ადამიანზე ვისაც გული შესტკივა“, - ამბობს ღონისძიების ორგანიზატორი დიმა ძნელაძე.

მესხეთის სახელმწიფო დრამატული თეატრის სალაროში ბილეთები უკვე იყიდება, ერთი ბილეთის ფასი 10 ლარია. საქველმოქმედო კონცერტიდან შემოსული თანხა მამუკა გვირჯიშვილის ანგარიშზე გადაირიცხება. მას ოპერაცია საზღვარგარეთ უნდა გაუკეთდეს და ამისთვის დაახლოებით 60 000 ლარი სჭირდება.

„ოპერაცია გერმანიაში უნდა გაუკეთდეს და ვცდილობთ ეს თანხა როგორმე შევაგროვოთ. გარდა ახალციხისა, საქველმოქმედო ღონისძიების ჩატარებას თბილისშიც ვაპირებთ“, - ამბობს დიმა ძნელაძე.

ღონისძიების საინფორმაციო მხარდამჭერები არიან ახალციხის ადგილობრივი ტელეკომპანია „მეცხრე არხი“, ტელეკომპანია „ბორჯომი“, გაზეთი „სამხრეთის კარიბჭე“ და რადიო „ფორტუნა პლუსი“.

მამუკა გვირჯიშვილის დასახმარებლად თანხის გადარიცხვა საბანკო ანგარიშზეცაა შესაძლებელი:

საქართველოს ბანკი: GE49BG0000000340554900

პრივატ ბანკი: GE09TP0036010940803907

ლიბერთი ბანკი: GE66LB0711130666817000

ასევე, შეგიძლიათ დარეკოთ შემდეგ ნომერზე: 0901700045 ზარის ღირებულება 1 ლარი.

[თამარ თოთაძე, ახალციხე]