შატილში კოშკის კედელი ჩამოინგრა

ადგილობრივების თქმით, ნგრევის საფრთხე აივნებიან კოშკებსაც ემუქრება.

- "ხევსურეთში, მდინარე ანაგისა და არღუნის ხეობაში, სტიქიური პროცესების მსვლელობას ვაკვირდებოდით და წინა კვირასთან შედარებით, გარკვეული ცვლილებები უკვე დავინახეთ. გზები იყო ჩამოშლილი, მათ შორის, შატილის კედლის ფრანგმენტიც. აივანიც საფრთხეშია, შეიძლება ისიც ჩამოიქცეს", - აცხადებს გეოგრაფი გიორგი დვალიშვილი.

მისივე თქმით, შატილის გადარჩენის საპროექტო დოკუმენტაცია უკვე არსებობს და კოშკების რეაბილიტაცია ერთ კვირაში დაიწყება. შატილის სარებილიტაციო პროექტისთვის კულტურული მეკვიდრეობის დაცვის ეროვნულმა სააგენტომ ტენედერში გამარჯვებული კომპანია უკვე გამოავლინა. ადგილზე დღეს სააგენტოს მონიტორინგის ჯგუფი გაემგზავრება და შატილის კომპლექსში არსებულ ვითარებას შეისწავლის.

შატილი, რომელიც 80-მდე კოშკსა და 2 ციხეს მოიცავს, 2007 წლის 24 ოქტომბრიდან იუნესკოს მსოფლიო მემკვიდრეობის საცდელ სიაშია შეტანილი.

[რუსუდან მამასახლისი, თბილისი]