თენგიზ კაპანაძემ კოსტავას N19-ში ბინა 1975 წელს შეიძინა. ამბობს, რომ იმ პერიოდში სახლის სიძველით დაინტერესდა, რადგან ეს პირველი ორსართულიანი სახლი იყო ახალციხეში და დაახლოებით ორ საუკუნეს ითვლის.
45 წლის წინაც და ახლაც ამ შენობის პირველ სართულზე სავაჭრო ობიექტებია განთავსებული, ერთ-ერთ ობიექტში, რომელიც კაპანაძეების ბინის ქვეშ მდებარეობს ამჟამად სარემონტო სამუშაოები მიმდინარეობს.
კაპანაძეების ოჯახმა მხოლოდ მაისში აღმოაჩინა, რომ მათი საცხოვრებელი სახლის პირველ სართულზე ერთი საყრდენი კედელი დანგრეულია: „ქვემოთ დაიწყეს მაღაზიის რემონტი და გამოჩნდა, რომ კედელს ძირი აღარ ჰქონდა, მანამდე არ ვიცოდით. კედელი ჩამონგრეულია სულ. ხვალ-ზეგ დაინგრევა. ვინც ახლა მაღაზიას არემონტებს მაგათი ბრალი არ არის, მაგრამ გვინდა, რომ მერიიდან ვინმემ ყურადღება მიაქციოს“, - ამბობს სახლის მეპატრონე თენგიზ კაპანაძე.
მისივე თქმით, რადგან სახლი ორსაუკუნოვანია, პრობლემის მოსაგვარებლად ადგილობრივ თვითმმართველობას, სამართალდამცველებს, მთავრობის ადმინისტრაციის ცხელ ხაზს რამდენჯერმე მიმართა: „თვის დასაწყისში დავწერე განცხადება ზაზა მელიქიძის სახელზე და პასუხი წერილობით ჯერ კიდევ არ მოსულა. კიდევ გვაქვს ორი განცხადება დაწერილი გუბერნატორისა და გახარიას სახელზე, მაგრამ აღარ მივიტანეთ ჯერ. განცხადებაში დახმარებას ვითხოვთ, რომ გაგვიმაგრონ საძირკველი. შიგნით მილიციაც იყო, მერიიდანაც იყვნენ, შედიან და ნახულობენ, მაგრამ ნახავენ და მიდიან. ფაქტია, რომ როგორც იყო ისევ ისეა“.
კაპანაძეები ამბობენ, რომ ოთახს, რომელსაც ნგრევა ემუქრება აღარ იყენებენ: „გამოვიტანე ამ ოთახიდან საწოლი და იქ აღარ ვწვებით. ჩვენ მოვიყვანეთ ხელოსნები და მოგვთხოვეს 15-20 ათასი ლარი უნდა ამ კედლის ამოყვანასო. საიდან ეს ფული. ვითხოვთ თვითმმართველობისგან საძირკველის გამაგრებას ან რამეს, რომ ნგრევაში არ მოყვეს ეს სახლი. გვეშინია, რომ ვიღაც მოყვება. მინმე ხომ უნდა დაინტერესდეს?! ვინც ახლა რემონტს აკეთებს იმასთან საქმე არ მაქვს მე, იმათ არ ჩამოუნგრევიათ“, - ამბობს თენგიზ კაპანაძე.
ახალციხის მუნიციპალიტეტის მერიაში ამბობენ, რომ კაპანაძეების წერილზე პასუხი წერილობით უკვე გაგზავნილია: „წერილი გაგზავნილია, შეიძლება ფოსტით ჯერ არ მისვლიათ“.
რაც შეეხება საძირკველის გამაგრებას, მერიაში ამბობენ, რომ კერძო საკუთარების მშენებლობა მათ პასუხისმგებლობაში არ არის. გარდა ამისა, მათივე ინფორმაციით, პირველ სართულზე არსებული სავაჭრო ობიექტის მეპატრონემ თავისი ნებით გამოთქვა კედლის გამაგრების სურვილი.
„აღნიშნულ პრობლემასთან დაკავშირებით მოქალაქემ განცხადებით მიმართა მუნიციპალიტეტის მერიას. საკითხის შესწავლისა და მდგომარეობის ადგილზე გაცნობის შემდეგ, კოსტავას #19-ში მდებარე საცხოვრებელი სახლის ერთ-ერთი ბინის მესაკუთრემ, რომელიც საკუთარ ფართში სარემონტო სამუშაოებს აწარმოებს, გამოთქვა მზადყოფნა, რომ პრობლემის მოგვარებას საკუთარი ძალებით უზრუნველყოფდა. ჩვენი ინფორმაციით, საერთო სარგებლობის კედლის გამაგრებითი სამუშაოები უკვე მიმდინარეობს“, - აცხადებენ ახალციხის მერიაში.
მიუხედვად იმისა, რომ კოსტავას N17-N19-ში მდებარე საცხლოვრებელი სახლი დაახლოებით ორ საუკუნეს ითვლის, იგი კულტურული მემკვიდრეობის დაცვის ძეგლთა ნუსხაში შეტანილი არ არის.
[თაკო ფეიქრიშვილი, ახალციხე]