„ენერგო–პრო–ჯორჯია“ მაღალმთიან დასახლებებში სუბსიდირების საკითხს ეხმაურება

„ენერგო–პრო ჯორჯია“ „სამხრეთის კარიბჭეში“ გამოქვეყნებულ სტატიას ეხმაურება და აცხადებს, რომ მაღალმთიან სოფლებში დენის გადასახადის სუბსიდირების პრობლემასთან კავშირში არ არის.

„ეს პროცესი რეგულირდება საქართველოს მთავრობის N418 დადგენილების მიხედვით. ჩვენი ვალდებულება კომპანიის მხრიდან სრულად გვაქვს შესრულებული. არანაირი შეფერხება ამ პროცესში ჩვენი მხრიდან არ ყოფილა“, – განაცხადა კომპანია „ენერგო–პრო ჯორჯიას“ საზოგადოებასთან ურთიერთობის სამსახურის წარმომადგენელმა ავთანდილ დვალიშვილმა.

მისივე თქმით, „ენერგო–პრო ჯორჯია“ საოციალური მომსახურების სააგენტოდან მიღებულ სუბსიდიას, ამავე სააგენტოს მონაცემების მიხედვით რიცხავს.

“ბრალდებასავით გამოდის. აქ დამნაშავე კომპანია არ არის. სახელმწიფო, ამ შემთხვევაში სააგენტო, ვის მონაცემსაც მოგვაწვდის, იმას ერიცხება სუბსიდია. ჩვენ ვართ მხოლოდ გამტარი. მაღალმთიან დასახლებაში ვინ ითვლება ამას წყვეტს სახელმწიფო. ჩვენ ზუსტი მონაცემი არ გვაქვს, შესაბამისად, ამის შესახებ ინფორმაციას სახელმწიფო სტრუქტურებს ვაცნობეთ წინასწარ, ამიტომ ჩვენი პასუხისმგებლობა არანაირად არ არის“, – ამბობს ავთანდილ დვალიშვილი.

შეგახსენებთ, რომ „სამხრეთის კარიბჭემ“ სტატია სახელწოდებით „მაღალმთიან სოფლებში ელექტროენერგიის გადასახადზე შეღავათით ყველა ვერ სარგებლობს“ 3 მარტს გამოაქვეყნა, სადაც ნათქვამია, რომ მაღალმთიან დასახლებაში ელექტროენერგიის სუბსიდიის დარიცხვას აბონენტების პირადი ნომრების არარსებობა აფერხებს. „ენერგო–პრო ჯორჯიაში“ კი აცხადებენ, რომ მათ აბონენტის პირადი ნომერი არ სჭირდებოდათ და შესაბამისად, არც ბაზა აქვთ.

[თინათინ ზაზაძე, ახალციხე]