ახალქალაქში ინფრასტრუქტურის სამინისტროს პასუხს ელოდებიან

წარდგენილი პროექტები სამი ქუჩის რეაბილიტაციას ეხება - რუსთაველის, ჩარენცის და თავისუფლების ქუჩა ქალაქის სასაფლაომდე. ერთი ხიდის რეაბილიტაციის პროექტია. ოთხი პროექტი სოფლების აზავრეთის, მაჯადიას, ეხტილასა და ქოთელიას წყალსადენებს ეხება. ასევე არის სოფელ დიდ და პატარა სამსარში მიმავალი გზისა და ახალქალაქიდან სოფელ დილისკასკენ სოფელ კარტიკამამდე მიმავალი გზის რეაბილიტაციის პროექტები.

ახალქალაქის მუნიციპალიტეტის ეკონომიკის სამსახურის უფროსის ვაან ბატოიანის თქმით, ამ გზებით ერთდროულად რამდენიმე სოფელი სარგებლობს, მათზე არჩევანი ამიტომ შეჩერდა: ”გვინდა გავაკეთოთ ის გზები, სადაც ბევრი მოსახლეობაა. დილისკას გარდა ამ გზით სოფელ ჩუნჩხასა და პტნას მცხოვრებლებიც ისარგებლებენ. კარტიკამის გზით ბავრას, კარტიკამის, აბულ ტახჩას და ბზავეტის მოსახლეობა ივლის“.

როდის დამტკიცდება პროექტები, ჯერ უცნობია. ვაან ბატოიანის თქმით, თანხების გადანაწილების შემდეგ პროექტირებასა და სამშენებლო სამუშაოების შესრულებაზე ტენდერი დაუყოვნებლივ გამოცხადდება.
შეგახსენებთ, საქართველოს რეგიონული განვითარებისა და ინფრასტრუქტურის სამინისტრომ საქართველოში ინფრასტრუქტურული პროექტების განსახორციელებლად 200 მლნ ლარი გამოყო. ახალქალაქიდან წარგზავნილი პროექტების ღირებულება ჯამში 8 მილიონს აღწევს.

[ქრისტინა მარაბიანი, ახალქალაქი]