ახალციხის გამგეობა ინფრასტრუქტურული პროექტების განსახორციელებლად ემზადება

ახალციხის მუნიციპალიტეტის გამგეობაში აცხადებენ, რომ სავარაუდოდ ერთ თვეში ზიკილიის საავტომობილი გზის, წყრუთი – ჭვინთა – ელიაწმინდის გზის დასაწყისისა და ახალციხე – ტატანისი – სვირი – ბოგის გზების რეაბილიტაცია დაიწყება.

ზიკილიის საავტომობილი გზისთვის 150.000 ლარია გამოყოფილი, წყრუთი – ჭვინთა – ელიაწმინდის გზის დასაწყისის რეაბილიტაციისთვის 601.375 ლარი დაიხარჯება, ახალციხე – ტატანისი – სვირი – ბოგის გზის რეაბილიტაციისთვის კი 300.923 ლარი.

როგორც ახალციხის მუნიციპალიტეტის გამგეობის ინფრასტრუქტურის სამსახურის უფროსი ნოდარ ბალახაშვილი ამბობს, აღნიშნულ სოფლებში ასფალტის საფარი დაიგება: „საკრებულოს სხდომაზე უკვე გავიტანეთ აღნიშნული საკითხი, ბიუჯეტში შევიდა ცვლილებები და როგორც კი დადგენილება გამოვა, აღნიშნული სამუშაოების შესასრულებლად ტენდერს გამოვაცხადებთ. სავარაუდოდ ორ კვირაში გამოვლინდება გამარჯვებული კომპანიები და სადღაც ერთ თვეში უკვე შევძლებთ სამუშაოების დაწყებას“.

მისივე თქმით, წყრუთი – ანის გზის რეაბილიტაციის პროექტი მთავრობის სხდომაზე განსახილველად დღეს, 22 მაისს გადის. მოწონების შემთხვევაში შესაძლებელია, რომ სამინისტრომ აღნიშნული პროექტიც დააფინანსოს.

„გარდა იმ პროექტებისა, რაც სამინისტროს მიერ უკვე დაფინანსებულია, ჩვენ მომზადებული გვაქვს კიდევ წყრუთი – ანის გზის რეაბილიტაციის პროექტი და ასევე გვინდა, რომ ოთხ სოფელში სასმელი წყლის სისტემის სამუშაოები დავიწყოთ. ეს პროექტები სამხარაულის ბიუროში გვაქვს გადაგზავნილი და ველოდებით პასუხს“, – ამბობს ბალახაშვილი.



[მანანა სარაშვილი, ახალციხე]