სოფელ ხეოთში მცხოვრებმა ცირა ბერიძემ დასუფთავების გადასახადის ქვითარი რამდენიმე დღის წინ მიიღო. მისი განმარტებით, წლის ბოლომდე 14 ლარი უნდა გადაიხადოს: „რით უნდა გადავიხადო, არ კითხულობენ საიდან უნდა ვიშოვოთ ეს ფული. მე საერთოდ ვერ ვსარგებლობ, ძალიან შორს ვცხოვრობ და როცა ნაგავი მომაქვს ურნა უკვე სავსე მხვდება“.
მისი თქმით, სოფელში მხოლოდ ოთხი ურნა დგას, რაც საკმარისი არ არის, გარდა ამისა, გადასახადის ოდენობა ოჯაში ჩაწერილი წევრების მიხედვით მისდის, რომლებიც წლებია მასთან აღარ ცხოვრობენ: “ადრე კარგი იყო უბნებში დადიოდა დასუფთავების მანქანა, ჩემს სახლთან ჩერებოდა, „მეშოკებში“ ვაგროვებდით ნარჩენებს და მერე მიქონდათ“.
ადგილობრივების განმარტებით არასამართლიანია გადასახადის გადანაწილებაც.
„4 სულზეც ორი ლარი უნდა გადავიხადო თვეში და 10 სულზეც?! ეს რა უბედურებაა, მე არც მაშინ მისარგებლია მანქანა რომ დადიოდა სოფელში და არც ახლა, რადგან შორს ვცხოვრობ ცენტრალური ქუჩიდან“, – განაცხადა ეთერ ვეშაგურმა.
ახალციხის მუნიციპალიტეტის გამგეობაში განმარტავენ, რომ სოფლებში დასუფთავების გადასახადს ივნისიდან გადაიხდიან, თუმცა ეს იმ სოფლებს ეხება, სადაც ნაგვის ურნები დგას და დასუფთავების მანქანაც ყოველ მესამე დღეს მიდის.
„ერთ სულზე 50 თეთრია გადასახადი, ოჯახზე არაუმეტეს ორი ლარისა, ანუ ოთხსულიან ოჯახსაც თვეში ორი ლარის გადახდა მოუწევს და 10 სულიანსაც. ეს გადაწყვეტილება 2014 წელს მივიღეთ საკრებულოს სხდომაზე“, – განაცხადა ახალციხის მუნიციპალიტეტის ენოკომიკური განვითარებისა და ქონების მართვის სამსახურის უფროსმა ნოდარ ტალახაძემ.
მისივე თქმით, მუნიციპალიტეტის მასშტაბით, თითქმის ყველა სოფელში დგას ნაგვის ურნა და დადის დასუფთავების მანქანა: "ამ ეტაპზე დარჩენილია სვირი–ტატანისის, ანი–ჭვინთის და თისელის მიმართულება, სადაც უახლოეს პერიოდში შევიტანთ ნაგვის ურნებს".
ადგილობრივ თვითმმართველობაში განმარტავენ, რომ გასულ წლებში ვალისა და სხვილის მოსახლეობა დასუფთავების გადასახადს ყოველთვიურად, სტაბილურად იხდიდა. მათგან გადასახადის ამოღება 95%–ია. შედარებით ნაკლებია გადასახადის ამოღება აწყური–აგარის მიმართულებით. დასუფთავების გადასახადს კი უმეტესად იურიდიული პირები იხდიან, ვიდრე ფიზიკური.
იურიდიული პირი ერთ გატანილ ნაგვის ურნაში 20–22 ლარს იხდის. სოფელში მდებარე მაღაზიების მეპატრონეები კი შედარებით ნაკლებს დაახლოებით 10–15 ლარს.
ნოდარ ტალახაძის განმარტებით ამ ეტაპზე ქალაქ ვალესა და დანარჩენ სოფლებში დაახლოებით 470 ურნა დგას, უახლოეს პერიოდში კი 75 დაემატება: "ეს იმ სოფლებში დაიდგმება, სადაც ნაკლები ურნა დგას“.
საფინანსო–საბიუჯეტო სამსახურის უფროსის გელა ლომიძის განმარტებით, მიმდინარე წლის ბიუჯეტიდან დასუფთავების კუთხით 279 000 ლარი იყო განსაზღრული, თუმცა კიდევ 30 000 ლარი დაემატება: “გაფართოვდა მომსახურების არეალი და საჭირო იყო თანხის გაზრდა“.
ადგილობრივ თვითმმართველობაში განმარტავენ, რომ გასულ წელს მუნიციპალიტეტის მასშტაბით გადასახადებიდან შემოსულმა თანხამ 36 440 ლარი შეადგინა, წელს კი 1 მაისის მონაცემებით ეს თანხა 14 830 ლარია.
[თინათინ ზაზაძე, ახალციხე]