2017 წლიდან ახალციხელები დასუფთავების გადასახადს გადაიხდიან

ახალციხეში მცხოვრებლები, ყოველთვიურად, დასუფთავების გადასახადს ერთ სულ მოსახლეზე 50 თეთრს გადაიხდიან. მაგრამ, ოჯახი, რამდენი წევრიც არ უნდა იყოს, 2 ლარზე მეტს არ გადაიხდის.

უკვე შექმნილია ბაზა, ვისაც დასუფთავების გადასახადის გადახდა დაეკისრება. შეძენილია სპეციალური პროგრამაც, რომელიც დაიანგარიშებს და ქვითარს ამობეჭდავს.

რომელი თვიდან დაიწყებს მოსახლეობა დასუფთავების გადასახადის გადახდას, ამ ეტაპზე უცნობია. თუმცა, უკვე გარკვეულია, რომ გადასახადისგან გათავისუფლდებიან სოციალურად დაუცელი ოჯახები.

ახალციხის მერიის მოსაკრებელის განყოფილების უფროსის გიორგი თედორაძის განმარტებით, დასუფთავების მოსაკრებლის შესახებ დადგენილება საკრებულომ 2014 წლის 22 აგვისტოს მიიღო, თუმცა აქამდე გადასახადს მხოლოდ იურიდიული პირები იხდიდნენ, ფიზიკური პირები კი არა.

„ყველა ორგანიზაციას თავისი ტარიფი აქვს და იმის მიხედვით იხდიან. ჩვენ ვიხელმძღვანელეთ „ადგილობრივი მოსაკრებლის შესახებ“ დადგენილებით, სადაც მაქსიმალური სულადობა განსაზღვრულია 4 სულით. ოჯახში 10 ადამიანიც რომ ცხოვრობდეს, მაინც 4 სულის ოდენობის თანხას გადაიხდის“, – განმარტავს გიორგი თედორაძე.

ადგილობრივ თვითმმართველობაში ამბობენ, რომ მოსაკრებლით შესული თანხა კვლავ ქალაქის დასუფთავებას მოხმარდება.

„ჩვენდა სამწუხაროდ, კანონდებლობაში არ არის საჯარიმო ან სხვა ზომებს რომ მივმართოთ. პირველ რიგში მოქალაქეობრივ თვითშეგნებამდე უნდა დავიდეს, რომ ეს ქალაქი არ არის მარტო მერიის ან რომელიმე უწყების. ჩვენი წვლილი უნდა შევიტანოთ ქალაქის დასუფთავებაში, ჩვენი შემოსავლები არ არის საკმარისი, რომ თანხის მობილიზება გავაკეთოთ“, – ამბობს გიორგი თედორაძე.

[თინათინ ზაზაძე, ახალციხე]