რა თანხა ამოიღო მერიამ ერთ წელში ახალციხეში დასუფთავების გადასახადიდან

ათწლიანი პაუზის შემდეგ ახალციხეში ადგილობრივებმა ნაგვის მოსაკრებლის გადახდა 2018 წლის პირველი მაისიდან დაიწყეს. ამ დროიდან მიმდინარე წლის 31 დეკემბრის ჩათვლით მერიაში მოსაკრებლის სახით სულ 15 000 ლარი შევიდა.

რაც შეეხება იურიდიულ პირებს, ამ ხნის განმავლობაში მათგან ამოღებულმა თანხის ოდენობამ 162 000 ლარი შეადგინა. აქედან 129 600 ლარი ქალაქიდან, 35 000 კი თემიდან.

„ერთი წლის მონაცემები 20 პროცენტს წარმოადგენს, თუმცა ცუდი შედეგი ნამდვილად არაა, მითუმეტეს რომ ჯერ აპრილის მონაცემები შემოსული არაა. თუ გავითვალისწინებთ სხვა მუნიციპალიტეტების მაგალითს, ჩვენგან განსხვავებით ისინი დიდი ხანია ამ გადასახადს იხდიან და წარმოიდგინეთ 45–50 პროცენტს ვერ ცდებიან“, – ამბობს ახალციხის მერიის ეკონომიკური დაგეგმვის ადგილობრივი მოსაკრებლებისა და გადასახადების განყოფილების უფროსი გიორგი თედორაძე.

წლის განმავლობაში ქვითარი ოჯახს ერთხელ მისდის. მასზე მითითებულია როგორც თვის, ასევე წლის გადასახადი ანგირიშის ნომერი.

„გადასახადზე წინააღმდეგობა არ ყოფილა, პირიქით მოსახლეობა მოხარული იყო. ისინი ადგილზე მოდიოდნენ, ზოგი ტელეფონზე რეკავდა და ცდილობდნენ გაესწორებინათ შეცდომები თუ რაიმეს აღმოაჩენდნენ ქვითარზე“, – ამბობს თედორაძე.

შეგახსენებთ, რომ თვითმმართველობამ ახალციხეში მცხოვრებლებისგან დასუფთავების გადასახადის ამოღება 2018 წლის პირველი მაისიდან დაიწყო.

[მარიამ ბარძიმაძე, ახალციხე]