”სოფლის მეურნეობის კორპორაცია” ბოლაჯურის მოსახლეობას პასუხობს

სოფელ ბოლაჯურის მოსახლეობა "სოფლის მეურნეობის კორპორაციას" 30 ჰექტარ სახნავ-სათეს ფართობს ედავება.

ვითარების გარკვევა "სამხრეთის კარიბჭემ" "ადიგენის ბოსტნეულის სადემონსტრაციო ნაკვეთის" ხელმძღვანელბასთან სცადა. ადგილზე მისულებს მხოლოდ დარაჯი და ნაკვეთის ზედამხედველი დაგვხვდნენ.

ზედამხედველმა კახაბერ ქიმაძემ განგვიმარტა, რომ მას მხოლოდ ტერიტორიის მეთვალყურეობა ევალება და კორპორაციის საქმიანობის შესახებ ვერაფერს გვეტყვის: "2012 წლის აპრილის თვიდან ვმუშაობ. ნაკვეთში კომბოსტო, კარტოფილი, წიწაკა, ლობიო და ხახვი გვეთესა. წელს რა იგეგმება, ნამდვილად არ ვიცი. მოყვანილი პროდუქტი ადგილზე იყიდებოდა. იმის გამო, რომ ხახვი გვიან დაითესა, შემოსვლა ვერ მოასწრო და გაგვიფუჭდა".

ზედამხედველი გვეუბნება, რომ მოსახლეობისთვის საცდელი ნაკვეთი დასაქმების საუკეთესო პერსპექტივა იყო.

- "გასულ წელს, ნაკვეთში, ბოლაჯურის მოსახლოების 80- პროცენტი იყო დასაქმებული. მოსახლოება ხელფასს დღიური გამომუშავებით იღებდა. გარდა ამისა, საცდელს 6 დარაჯი ჰყავდა, თითოეულის ხელფასი 300 ლარს შედგენდა", - ამბობს იგი.


სს "სოფლის მეურნეობის კორპორაციის" დირექტორი ალექსანდრე ხოჯრევანიშვილი ამბობს, რომ ერთი თვეა ნაკვეთი შპს "ქართულ ბოსტნეულს" გადაეცა.

რამდენად სამართლიანია მოსახლეობის მოთხოვნა, ხოჯრევანიშვილს ამ საკითხზე კომენტარის გაკეთება უჭირს. იმ მოტივით, რომ დირექტორად ახალი დანიშნულია: "სასურველია ჩამოვიდნენ და ადგილზე გაგვესაუბრონ, ამის შემდეგ გავერკვევით სიტუაციაში".

იგივე პასუხი აქვს დირექტორს კომპენსაციების თემაზეც: "ამ ადამიანებს შეუძლიათ გამოცხადდნენ ჩვენთან, გავარკვევთ, თუ აქვთ დაწერილი განცხადება და თუ აქვთ საბუთი, რომ ნამდვილად დაზარალდნენ. მე მქონდა შეხება იმ ადამიანებთან ვინც ზიანი მიიღო და ჰქონდათ არგუმენტაცია დასაბუთებული. მათზე გაიცა კომპენსაცია".

[თინათინ ზაზაძე, ადიგენი]