სოფლებში საზოგადოებრივი თვითმმართველობის შექმნა იგეგმება

ამის შესახებ საქართველოს რეგიონული განვითარებისა და ინფრასტრუქტურის მინისტრის მოადგილემ თენგიზ შერგელაშვილმა რეგიონის არასამთავრობო სექტორისა და მედიის წარმომადგენლებთან შეხვედრის დროს ისაუბრა.

- ”საზოგადოებრივი თვითმმართველობა ეს არის თითოეულ სოფელში ფორმირებული საჯარო სამართლის იურიდიული პირი, რომელიც სოფლის კრებების ერთობლიობას წარმოადგენს. შედარებით პატარა სოფლებში კრების თავმჯდომარეს მოსახლეობა აირჩევს, დიდ სოფლებში უბნების მიხედვით ჩატარებული კრებები იქნება და ისინი წარმომადგენლობით საბჭოს აირჩევენ, - განმარტა თენგიზ შერგელაშვილმა და დაამატა, რომ საზოგადოებრივი თვითმმართველობის გარკვეული ფუნქციები ორ ეტაპად გაიყოფა: პირველი ეს არის 2014 წლის ადგილობრივი არჩევნები და მეორე მისი შემდგომი პერიოდი”.

მისივე თქმით კანონმდებლობის დროულად მიღების შემთხვევაში საზოგადოებრივი თვითმმართველობის ფორმირება მიმდინარე წელს მოხდება. 2014 წელს დაგეგმილი ადგილობრივი არჩევნების შემდგომ აღნიშნულ ინსტიტუტს დამატებითი დატვირთვა ექნება.

ამ ეტაპზე საზოგადოებრივი თვითმმართველობის მთავარი ამოცანა იმ პროექტების შერჩევაში და მონიტორინგში მონაწილეობა იქნება, რომელიც საერთო ეროვნული პროგრამით ხორციელდება, მაგრამ სოფლებს უკავშირდება.

- ”მაგალითად სოფლის მხარდაჭერის პროგრამა. წელს ეს პროგრამა უკვე დაწყებულია და პროექტების შერჩევაში საზოაგდოებრივი თვითმმართველობა მონაწილეობას ვეღარ მიიღებს, ის მხოლოდ მონიტორინგის განახორციელებს. თუმცა, მომდევნო წელს მას პროექტების შერცევის პროცესში შეეძლება ჩაერთოს”, - განაცხადა თენგიზ შერგელაშვილმა.

მისივე თქმით, მთავარი ფუნქცია კი, რაც საზოგადოებრივ თვითმმართველობას 2014 წლის ადგილობრივ არჩევნებამდე ექნება, ესაა რეფორმის პროცესში მოსახლეობასთან კონსულტაციების გამართვა.

- ”ადგილობრივი არჩევნების შემდგომ საზოგადოებრივი თვითმმართველობა ინტეგრირებული იქნება საერთო თვითმმართველობის სისტემაში. რაც გულისხმობს იმას, რომ მუნიციპალიტეტს რომელშიც ეს სოფელი შედის საშუალება ექნება, რომ თავისი შეხედულებისამებრ მოახდინოს ცალკეული ფუნქციების დელეგირება. ამავდროულად ჩართული იქნება საბიუჯეტო პროცესში”, - განაცხადა საქართველოს რეგიონული განვითარებისა და ინფრასტრუქტურის მინისტრის მოადგილემ.

[თამარ თოთაძე, ახალციხე]