სამხედრო ტექნიკის გამოფენა ახალციხეში [Photo]

ახალციხეში, თამარაშვილის ქუჩაზე 08:00 საათიდან სამხედრო ტექნიკაა გამოფენილი.

დამოუკიდებლობის დღისადმი მიძღვნილ, ქართული შეიარაღების გამოფენაში მონაწილეობას ორი ქვედანაყოფი იღებს. პირველი ქვეითი ბრიგადის მე–13 მოტორიზებული ბატალიონია, რომელსაც წარმოდგენილი აქვს შეიარაღება, კავშირგაბმულობის საშუალებები და ქართველი ჯარისკაცების აღჭურვილობა.

მეორე კი ლეიტენანტ შოთა ხურციძის ჯავშანსატანკო სასწავლო ცენტრია, რომელმაც ავტოსადგურის ტერიტორიაზე დამთვალიერებლისთვის ტანკი, ქვეითი საბრძოლო მანქანები, ჰამერის ტიპის ტექნიკა, კავშირგაბმულობის ტაქტიკური მართვის პუნქტი და კვადროციკლი წარმოადგინა.

როგორც, კაპიტანი უჩა მაჩაიძე განმარტავს, ყველა საბრძოლო ტექნიკას თავისი ინსტრუქტორი ჰყავს, რომელიც დაინტერესებულ პირებს ამა თუ იმ ტექნიკისა თუ აღჭურვილობის შესახებ ამომწურავ ინფორმაციას აწვდის.

ავტოსადგურის ტერიტორიაზე განლაგებულ საბრძოლო ტექნიკას, დილიდან ბევრი დამთვალიერებელი ყავს, მათგან ყველაზე მეტი ბავშვია. პატარებმა ჯარისკაცის აღჭურვილობაც მოირგეს და ტანკებზე თუ სხვა ტექნიკაზე ფოტოებიც გადაიღეს.

„ტანკებზეც ვიყავი ასული და ჯარისკაცის ფორმაც მეცვა, ძალიან სახალისოა, მინდა რომ მეც ჯარისკაცი ვიყო!“ – გვეუბნება 7 წლის ლუკა აკოფაშვილი.

ბოლო წლებში, თითქმის ყველა 26 მაისს საბრძოლო ტექნიკის გამოფენას ესწრება ოთიკო ნასყიდაშვილიც: „ყოველ წელს მოვდივარ ხოლმე, ძალიან მიხარია ასეთი გამოფენები, და ჯარისკაცების ფორმების ჩაცმა, კიდე ტანკების დათვალიერება“.

















ზუსტად 91 წლის წინ, 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო. საქართველოს დემოკრატიულმა რესპუბლიკამ, რომლის დამოუკიდებლობა ევროპის წამყვანმა ქვეყნებმა ცნეს, არსებობა სამი წლის თავზე, საბჭოთა რუსეთის მიერ განხორციელებული ოკუპაციის შემდეგ, შეწყვიტა.

საქართველომ დამოუკიდებლობის აღდგენა 70 წლის შემდეგ შეძლო. 1991 წლის 9 აპრილს, საქართველოს ხელისუფლებაში მოსულმა ეროვნულმა ძალებმა, 31 მარტის საყოველთაო რეფერენდუმის საფუძველზე, საქართველოს სახელმწიფოებრივი დამოუკიდებლობა აღადგინეს.

[ლუბა გიორგაძე – ახალციხე]