ფოიერვერკი და ცეცხლოვანი შოუ – ახალციხეში საზეიმო ღონისძიებები დასრულდა

საქართველოს დამოუკიდებლობის 26–ე წლისთავის აღნიშვნა ახალციხეში, „ახალციხის ციხის“ ტერიტორიაზე ადგილობრივი შემსრულებლებისა და ესტრადის მომღერლების გალა კონცერტით დასრულდა.

კონცერტის დასასრულს მსმენელისათვის რომან რცხილაძის ბენდმა იმღერა და ახალციხელებს სოლო კონცერტის ჩატარებასაც დაჰპირდა.





კონცერტის პარალელურად, „ახალციხის ციხის“ მეორე ნაწილში საქართველოს ტურიზმის ეროვნული ადმინისტრაციის ორგანიზებით მე–12 საუკუნის საქართველო და „ვეფხისტყაოსნის“ პერსონაჟები გააცოცხლეს და ქაჯეთის ციხის აღების პერფომანსი დადგეს.

„სიმბოლურად ქაჯეთის ციხის აღების სცენას ვაცოცხლებთ, ეს ერთგვარი პერფომანსია დამოუკიდებლობის დღესთან დაკავშირებული და მინიშნება იმისა, რომ ყოველთვის მზად ვართ ჩვენი დამოუკიდებლობა დავიცვათ“,–ამბობს რეჟისორი კახა გოგიძე.

დამოუკიდბლობის დღისადმი მიძღვნილი ღონისძიებები ფოიერვერკით დასრულდა.






შეგახსენებთ, რომ 91 წლის წინ, 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო. საქართველოს დემოკრატიულმა რესპუბლიკამ, რომლის დამოუკიდებლობა ევროპის წამყვანმა ქვეყნებმა ცნეს, არსებობა სამი წლის თავზე, საბჭოთა რუსეთის მიერ განხორციელებული ოკუპაციის შემდეგ, შეწყვიტა.

საქართველომ დამოუკიდებლობის აღდგენა 70 წლის შემდეგ შეძლო. 1991 წლის 9 აპრილს, საქართველოს ხელისუფლებაში მოსულმა ეროვნულმა ძალებმა, 31 მარტის საყოველთაო რეფერენდუმის საფუძველზე, საქართველოს სახელმწიფოებრივი დამოუკიდებლობა აღადგინეს.

[ლუბა გიორგაძე, ახალციხე]