მე–12 კლასელები გამოსაშვებ გამოცდებს მათემატიკასა და ფიზიკაში აბარებენ

მათემატიკასა და ფიზიკაში საგამოცდო პროცესი დილის 09:00 საათიდან დაიწყო.

როგორც, ახალციხის რესურსცენტრში აცხადებენ, საგამოცდო პროცესი მშვიდ ვითარებაში მიმდინარეობს.
მე–12 კლასელებისათვის, 2017 წლის გამოსაშვები გამოცდები ხვალ, 25 მაისს ქიმიის საგნის ჩაბარებით დასრულდება.

გამოსაშვებ გამოცდებზე მინიმალური გამსვლელი ქულაა 5.5. შეფასების ათვლა იწყება 5 ქულიდან და ზღვრის გადასალახად მოსწავლემ დაახლოებით, 15 მარტივ კითხვას უნდა გასცეს სწორი პასუხი.

ქალაქ ახალციხესა და თემში გამოცდებს დაახლოებით 490 მე–12 კლასელი აბარებს. გარდა ამისა გამოცდებზე ის მოსწავლეებიც არიან დარეგისტრირებულები, რომლებმაც გასულ წელს მინიმალური ქულები ვერ დააგროვეს.

გამოსაშვები გამოცდები 21 მაისს დაიწყო და საქართველოს 1 500-ზე მეტ სკოლაში ტარდება. შეფასებისა და გამოცდების ეროვნული ცენტრის ინფორმაციით, გამოცდებისათვის 48 000-ზე მეტი მოსწავლეა დარეგისტრირებული.

იმ მოსწავლეებს, რომლებმაც მე-11 კლასის რომელიმე გამოცდაში ზღვარი ვერ გადალახეს ან ვერ შეძლეს გამოცდაზე გამოცხადება, საშუალება აქვთ რვავე გამოცდა ერთდროულად ჩააბარონ. გამოცდას აბარებენ მე–12 კლასელებიც, რომლებმაც გასული წლის გამოცდაზე საჭირო ქულები ვერ დააგროვეს.
[sknews.ge]