ოლეგ სანდროშვილი: „ახალციხემ თვითმმართველ ქალაქად ჩამოყალიბების შანსი დაკარგა“

ახალციხის მუნიციპალიტეტის საკრებულოს ყოფილი თავმჯდომარე ოლეგ სანდროშვილი იმ მიზეზებზე საუბრობს, რის გამოც თვითმმართველობის არჩევნებამდე ქალაქის და თემის გაერთიანების საკითხი დღის წესრგიში დადგა. ერთადერთი რაშიც ის დღეს ქალაქ ახალციხის ადგილობრივი თვითმმართველობის წარმომადგენლებს სრულად ეთანხმება, არის ის რომ მათ მუშაობას უარყოფითად აფასებს. აქედან გამომდინარე, სანდროშვილი მიიჩნევს, რომ რეფორმამ, რომელიც სამი წლის წინ განხორციელდა ვერ გაამართლა: "იმიტომ კი არა რომ იდეა იყო ცუდი, უბრალოდ, ამ იდეის უშუალო შემსრულებლები, ანუ თივთმმართველობების წარმომადგენლები, გამოდგნენ უნიათოები". სანდროშვილი ამბობს, რომ მათ ვერ, ან არ შეძლეს ბიუჯეტის სწორად დაგეგმვა, ხელოვნურად გაზარდეს შტატები, დაასაქმეს არაპროფესიონალები გაურკვეველი დამსახურებებისთვის, სათანადოთ ვერ იმუშავეს ინვესტიციების მოზიდვის კუთხით: "ასევე ხარჯებში განახორციელეს ისეთი, პროექტები, რომლებიც აშკარად შეიცავდა კორუფციულ ელემენტებს და ა.შ. ყოველივე ამან შექმნა ლოგიკური აზრი, რომ ახალციხეს, როგორც თვითმმართველ ქალაქს ფინანსურადაც და მმართველობითაც დამოუკიდებლად არ შეუძლია არსებობა, რასაც მე ნამდვილად არ ვეთანხმები!" სანდროშვილი დარწმუნებულია, რომ ახალციხეს, როგორც თვითმმართველ ქალაქს თავისუფლად შეუძლია ფურქციონირება, რადგან მას რეგიონში აქვს პირველქალაქობის დიდი ისტორიული წარსული, შესაბამისად გააჩნია პერსპექტივები ტურიზმისა და დასვენების, სპორტის, კულტურის, ჯანდაცვის, ეკონომიკისა და სოციალურ სფეროებში: „თვითმმართველობაზე ექსპერიმენტების ჩატარებას, უკეთესი იქნება თუ მმართველობით ორგანოებში მოიყვანენ პროფესიონალებს, რომლებიც დაკისრებულ ვალდებულებებს კეთილსინდისიერად შეასრულებენ“. საკრებულოს ყოფილი თავმჯდომარე დარწმუნებულია, რომ დეპუტატებს ქალაქის სტატუსის გაუქმების შესახებ გადაწყვეტილება ზემოდან მითითებით მიაღებინეს: „დეპუტატების სუსტი და უსაფუძვლო არგუმენტებიდან გამომდინარე, უცხო თვალისთვისაც ნათელია, რომ მათ გადაწყვეტილება საკუთარი შეხედულებით არ მიუღიათ. 100% – ით ვიცი, რომ ეს არ იყო მათი ნება, იმიტომ რომ მეც გავიარე ეს პროცესი. თუმცა მე არცერთი დეპუტატი არ შემიზღუდავს, ყველას მივეცი საკუთარი აზრის გამოთქმის უფლება და უშუალოდ მათი შეხედულებიდან გამომდინარე მივიღეთ გადაწყვეტილება საკრებულოს სხდომაზე“. სანდროშვილი ფიქრობს, რომ დეპუტატების მიერ 19 მაისს გამართულ სხდომაზე დაფიქსირებული პოზიცია ახალციხეში მცხოვრები უმრავლესობის აზრს არ გამოხატავს: "დეპუტატი ვალდებულია ამომრჩევლის უფლებები დაიცვას, ამიტომ მათ გადაწყვეტილებას თუნდაც ამ მიზეზის გამო დადებითად ვერ შევაფასებ". მისივე თქმით, სამი წლის წინ გაყოფის პროცესი რთული იყო და არც ახლა შეერთება იქნება მარტივი: "საკმაოდ შრომატევადი იყო, შეხვედრები გვქონდა სამთავრობო და არასამთავრობო სტრუქტურებთან, უცხოელ სპეციალისტებთან, სამუშაო ჯგუფებთან და მოსახლეობასთან. ისე მიმაჩნია, რომ გაყოფის პროცესი მაინც დაჩქარებულად მოხდა და ყველა ნიუანსს უფრო დეტალური შესწავლა სჭირდებოდა". საკრებულოს ყოფილი თავმჯდომარე მიიჩნევს, რომ შეერთების პროცესი გაყოფის პროცესზე უფრო მტკივნეული იქნება, რადგან ბევრი სამსახური გაუქმდება და არა ერთი ადამიანი უმუშევარი დარჩება: „ტექნიკურად კი მცირედი განსხვავებებით, მუნიციპალიტეტი სამი წლის წინანდელ მდგომარეობას დაუბრუნდება, რაც ვფიქრობ სამუშაო პროცესებს არ შეაფერხებს, რა თქმა უნდა სწორი მართვის პირობებში“. მისი თქმით, რაც არ უნდა იყოს, ახლა მისთვის ყველაზე მტკივნეული ის არის, რომ ახალციხემ თვითმმართველ ქალაქად ჩამოყალიბების და განვითარების შანსი დაკარგა. თუმცა, სანდროშვილი იმედს იტოვებს, რომ უახლოს მომავალში მოვლენები ისევ ქალაქის სასიკეთოდ დიდი ალბათობით სასიკეთოდ განვითარდება. შეგახსენებთ, რომ ქალაქ ახალციხის საკრებულოს რიგგარეშე სხდომა, სადაც ქალაქისა და თემის გაერთიანების საკითხს განიხილავდნენ 19 მაისს გაიმართა.სხდომაზე დეპუტატების ურმავლესობამ თვითმმართველი ქალაქის სტატუსის გაუქმებას მხარი დაუჭირა. სხდომა ხმაურის ფონზე ერთ საათს მიმდინარეობდა; [თამუნა უჩიძე, ახალციხე]