წყალმომარაგება 24-საათიანი ორ წელიწადში იქნება

ამის შესახებ რეგიონული მედიის ჟურნალისტებს 22 მარტს, წყლის საერთაშორისო დღეს, ”საქართველოს გაერთიანებული წყალმომარაგების კომპანიის” დირექტორმა არჩილ საბუტაშვილმა განუცხადა.

სემინარზე, რომელიც წყალმომარაგების კომპანიამ წყლის საერთაშორისო დღესთან დაკავშირებით, ჟურნალისტებისთვის გამართა, წყლის რესურსების დაზოგვისა და გაფრთხილების გზებსა და მეთოდებზე ისაუბრეს. შეხვედრა თბილისში, ”გაერთიანებული წყალმომარაგების კომპანიის” ოფისში შედგა.

კომპანიის წარმომადგენლებმა მედიას გასული ორი წლის მუშაობის შედეგები გააცნეს და სამომავლო პროექტებზე ესაუბრნენ. შემდგომ, კი მათ კითხვებს უპასუხეს. ჟურნალისტების შეკითხვები ძირითადად მათ რეგიონებში არსებულ პრობლემებს შეეხებოდა.

კომპანიაში ამბობენ, რომ გაეროს ექსპერტების მონაცემებით, დედამიწის მოსახლეობის ერთ მეექვსედს სუფთა სასმელი წყალი არ მიეწოდება, ბევრ ქვეყანაში კი სასმელი წყალი მხოლოდ იყიდება. მსოფლიოში 2,4 მილიარდ ადამიანს არ აქვს ცხოვრებისათვის აუცილებელი შესაბამისი სანიტარული პირობები. წყლის დღე - შეახსენებს ყველას, რომ უნდა გავუფრთხილდეთ წყლის რესურსებს, რაციონალურად და ეკონომიურად გამოვიყენოთ ბუნებრივი რესურსები. მაგალითისთვის, საერთაშორისო ექსპერტების კვლევით დადგინდა, რომ თუკი ონკანი არაა სრულად დაკეტილი და მოწვეთავს ვთქვათ 3 მმ სიგრძის წვეთი, დღე-ღამის განმავლობაში დაიხარჯება 864 ლიტრი წყალი.

“საქართველოს გაერთიანებული წყალმომარაგების კომპანიის” მონაცემებით, 2012 წლამდე საქართველოში 61 000 აბონენტი გამრიცხველიანდა, 2013 წელს 44 000 გამრიცხველიანდება, 2015 წლამდე ნავარაუდევია სრული პროცესის დამთავრება.

[ნუკა სტეფნაძე, ახალციხე]