კვირის აქცენტი: რისთვის სჭირდება ახალციხეს ქალაქის სტატუსი [Video]

რატომ უნდა ჰქონდეს ახალციხეს თვითმმართველი ქალაქის სტატუსი, რა ნაბიჯები უნდა გადაედგა რეგიონული განვითარების სამინისტროსა და მთავრობას, სტატუსის გაუქმებაზე ფიქრის ნაცვლად – „სამხრეთის კარიბჭეს“გადაცემაში "კვირის აქცენტი" არასამთავრობო ორგანიზაცია „დემოკრატ მესხთა კავშირის“ დირექტორი გიორგი ანდღულაძე და ახალციხის საკრებულოს დეპუტატი პარტია „ევროპული საქართველოდან“, ასევე, ახალციხის საკრებულოს (დაყოფამდელი პერიოდის) ყოფილი თავმჯდომარე მალხაზ გიქოშვილი საუბრობენ.

ამავე გადაცემაში თქვენ მოისმენთ ახალციხის მცხოვრებლების პოზიციას.



შეგახსენებთ

მთავრობა 12 თვითმმართველი ქალაქიდან შვიდისთვის სტატუსის გაუქმებას ფიქრობს. ეს ქალაქებია: ოზურგეთი, გორი, ამბროლაური, ახალციხე, თელავი და მცხეთა. მიზეზად ხარჯების დაზოგვას ასახელებენ.

"7 ქალაქისთვის თვითმმართველი ერთეულის სტატუსის გაუქმება, რეფორმის დეკლარირებული პრინციპებიდან გადახვევაა" – ფიქრობენ არასამთავრობო ორგანიზაციები, რომლებმაც, საქართველოს პარლამენტის თავმჯდომარესა და საქართველოს პრემიერ-მინისტრს მიმართვა გაუგზავნეს.

პარლამენტის თავმჯდომარე 7 ქალაქისთვის სტატუსის გაუქმებაზე: დღეს ამაზე პოზიცია ვერ მექნება – ასეთი იყო ირაკლი კობახიძის პირველი რეაქცია და პასუხი არასამთავრობოების მიმართვის შემდეგ;

საზოგადოებრივი ორგანიზაციების მიერ გავრცელებული მიმართვის პასუხად, საქართველოს რეგიონული განვითარების სამინისტრომ ოფიციალური განცხადება გაავრცელა, რომელშიც ამ საკითხზე დაწყებული მსჯელობა დაადასტურა და არგუმენტები მოიყვანა.

უკურნებელი პოლიტიკური სენი – ასე უწოდებს ინიციატივას ექსპერტი თვითმმართველობის საკითხებში, ირაკლი მელაშვილი და ამბობს, რომ "ქალაქს, რომელსაც არ აქვს საკუთარი ბიუჯეტი, საკუთარი შემოსავლები, საკუთარი ქონება, არ აქვს შესაძლებლობა, განსაზღვროს საკუთარი განვითარების პრიორიტეტები, ხელგაწვდილი მოუწევს სიარული ნებისმიერი სასიკეთო წამოწყებისათვის აუცილებელი დაფინანსების მოსაპოვებლად".

რის ხარჯზე და რატომ ცდილობს მთავრობა მუნიციპალიტეტების გაერთიანებას და როგორ ესმის ხელისუფლებას დემოკრატიის განვითარება თვითმმართველობებში; რეფორმის ჩაშლის მცდელობა და თვითმმართველობების დუმილი – ნახეთ მასალაში – ბრძოლა თვითმმართველი ქალაქის სტატუსისთვის


არქივი

„ქვეყანა, რომელსაც მმართველობის პირველი დონე სუსტი აქვს, წარმატებას ვერასოდეს მიაღწევს", – ასე ფიქრობდნენ ახალციხეში ჯერ კიდევ 2013 წელს, მაშინ, როდესაც ახალციხისთვის თვითმმართველი ქალაქის სტატუსის მინიჭებაზე დაიწყო საუბარი, რასაც ახალციხეში ასე ელოდნენ. ნახეთ, სტატია არქივიდან – ახალციხე თვითმმართველი ქალაქი ხდება.

[sknews.ge]