უფასო იურიდიული მომსახურება რელიგიური და ეთნიკური უმცირესობის ქალებს

არასამთავრობო ორგანიზაცია „საქართველოს დემოკრატიული ინიციატივა“ სამცხე–ჯავახეთსა და აჭარაში პროექტს „სამართალწარმოება თანასწორობისთვის“ განახორციელებს.

პროექტის მიზანი საქართველოში მცხოვრები რელიგიური და ეთნიკური უმცირესობების სამართლებრივი სტატუსის გაუმჯობესებაა, უფრო ზუსტად კი ამ თემში შემავალი ქალებისა და გოგონების მართლმსაჯულებაზე ხელმისაწვდომობა.

პროექტის ფარგლებში უფასო იურიდიულ მომსახურებას ქალები და გოგონები არამხოლოდ კონსულტაციის დონეზე, არამედ სასამართლოს ბოლო ინსტანციამდე მიიღებენ.

პროექტი მოიცავს ახალციხეს, ახალქალაქს, ნინოწმინდას, ხულოს, შაუხევს და ადიგენის მუნიციპალიტეტებს. აღნიშნულ ქალაქებში ორგანიზაციას მინიმუმ ერთი სტაჟიორი და ერთი ადვოკატი ეყოლება. ამ დროისთვის GDI აქტიურ ახალგზარდებსა და ადვოკატებს არჩევს.

„უმნიშვნელოვანესია ის, რომ ახალგაზრდები უშუალოდ ამ რელიგიური და ეთნიკური უმცირესობებით დასახლებული პუნქტებიდან იყვნენ. ასე მათ მეტი ნდობა ექნებათ. ეს ახალგაზრდები თემთან ურთიერთობასა და მათთან დაკავშირებაში დაგვეხმარებიან“, – ამბობს „დემოკრატიული ინიციატივა საქართველოს“ იურისტი ედუარდ მარიკაშვილი.

რაც შეეხება ადვოკატებს, აქ შერჩევის მთავარი კრიტერიუმი მათი სურვილი და მსგავს თემებზე მგრძნობელობა იქნება.

„შემდეგ ამ ადვოკატებს ხელშეკრულების საფუძველზე ჩვენ ავუნაზღაურებთ მოსმახურების საფასურს“, – აცხადებს მარიკაშვილი.

ახალციხეში GDI-სთან თანამშრომლობისა და პროექტში ჩართვის სურვილი იურიდიული ფაკულტეტის სტუდენტმა თაკო მამუკაშვილმა გამოთქვა: „არაფორმალური სწავლება პროფესიის უკეთ ათვისებაში დამეხმარება“.

პროექტის ფარგლებში, ჯამში 10–12 სტაჟიორი შეირჩევა. დაინტერესებულ ახალგაზრდებს პროექტში ჩართვის შესახებ შეუძლიათ ორგანიზაციას ელექტორნულ ფოსტაზე mgigineishvili@gdi.ge მიწერონ. შერჩეულებს კი ორი კვირის განმავლობაში გადაამზადებენ. გადამზადების კურსს ადვოკატებიც გაივლიან და პროექტის განხორციელება ამის შემდეგ დაიწყება.

სტაჟიორებისა და ადვოკატების შერჩევის პროცესი მომავალ კვირაში დასრულდება.

პროექტს საქართველოს დემოკრატიული ინიციატივა ახორციელებს East-West Management Institute (EWMI), PROLoG, USAID –ის ფინანსური მხარდაჭერით.



[თამუნა უჩიძე, ახალციხე]