დავით სერგეენკო აბასთუმნის საავადმყოფოს საკითხის შესწავლას გეგმავს

ამის შესახებ ჯანდაცვის მინისტრმა პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე განაცხადა. კომიტეტის სხდომაზე დავით სერგეენკო კომიტეტის მოწვევით მივიდა.

აბასთუმნის ტუბსაწინააღმდეგო საავადმყოფოს საკითხი სხდომაზე პარლამენტარმა ბიძინა გუჯაბიძემ დასვა. შეგახსენებთ, რომ გუჯაბიძე საპარლამენტო არჩევნებზე ადიგენის მუნიციპალიტეტში ”ქართული ოცნებიდან” იყრიდა კენჭს.

გუჯაბიძის კითხვაზე, მოხდება თუ არა აბასთუმნის ტუბსაწინააღმდეგო საავადმყოფოში ხარისხის კონტროლი, სერგეენკომ განაცხადა, რომ სამედიცინო დაწესებულებების ხარისხის კონტროლი მთელი საქართველოს მასშტაბით, უკლებლივ ყველა სამედიცინო დაწესებულებაში განხორციელდება.

”აბასთუმანს რაც შეეხება, მე დავავალებ, რომ ცალკე შეისწავლონ დაჩქარებული წესით, რადგან აქტუალობა მაღალია. თუმცა, ხარისხის კონტროლი განხორციელდება უკლებლივ ყველა სამედიცინო დაწესებულებაზე. ეს უნდა მოიცავდეს ოთხივე კომპონენტს, რისგანაც სამედიცინო მომსახურება შედგება. ეს არის საკუთრივ შენობა, აღჭურვილობა, პერსონალი და ის რეგულაციები რითიც ისინი მუშაობენ”, - განაცხადა ჯანდაცვის მინისტრმა.

შეგახსენებთ, გასული, 2012 წლის სექტემბერში აბასთუმნის ტუბსაავადმყოფოში მედდა დაავადდა. რით იყო ეს გამოწვეული, გენეტიკური ფაქტორით თუ უსაფრთხოების წესების დარღვევით, საავადმყოფოს დირექტორი ვერ აკონკრეტებდა. პაციენტების ნაწილი ჩვენთან საუბარში საავადმყოფოში პირობების არარსებობას უჩიოდა.

შენობა, სადაც ამჟამად ტუბსაავადმყოფოა განთავსებული 1924 წელს აშენდა. აქ წლების განმავლობაში სანატორიუმი „ზეკარი“ ფუნქციონირებდა. ტუბსაწინაღმდეგო დაწესებულებად კი 6 წელია რაც გადაკეთდა.


აბასთუმნის ტუბსაავადმყოფო

[თამარ თოთაძე, ახალციხე]