ბათუმი-ახალციხის გზის მშენებლობაზე დასაქმებული მუშები საპროტესტო აქციებს აანონსებენ

როგორც „სამხრეთის კარიბჭეს“ ბათუმი–ახალციხის გზის მშენებლობაზე დასაქმებულმა მუშამ თემურ ინასარიძემ განუცხადა, პროტესტს იქამდე გააგრძელებენ, ვიდრე კომპანია კუთვნილ ხელფასებს არ ჩაირიცხავ: „ხვალ აქციებს დავიწყებთ. თუ ვინმე ტექნიკას აამუშავებს, ხელს შევუშლით და მუშაობის უფლებას არ მივცემთ".

მისივე თქმით, ამ დრომდე დამსაქმებელი კომპანიიდან არავინ გამოხმაურებიათ.

სამშენებლო კომპანია "ჩელიაბინსკტრანსსიგნალის” ხელმძღვანელობას, რომელიც ბათუმი–ახალციხის 8.5 კმ–იან გზის მონაკვეთის მშენებლობას ახორციელებს, „სამხრეთის კარიბჭე“ ვერც დღეს დაუკავშირდა. როგორც კომპანიის დირექტორს, ისე საქმის მწარმოებელს, ტელეფონი დღესაც გამორთული აქვთ.

შეგახსენებთ, რომ ბათუმი–ახალციხის გზის მშენებლობაზე დასაქმებული 60–მდე მუშა გუშინ, 3 მაისს გაიფიცა. ისინი ამბობენ, რომ კომპანიას სამი თვის სახელფასო დავალიანება აქვს და არ უხდის. მუშები პროტესტს იქამდე გააგრძელებენ, ვიდრე დამსაქმებელი კუთვნილ ხელფასებს არ დაურიცხავს.

[ლუბა გიორგაძე, ახალციხე]