გაგრძელდება თუ არა რაბათის რეაბილიტაცია?

ახალციხის მუნიციპალიტეტის მიმდინარე წლის ბიუჯეტში რაბათის განვითარების პროგრამისათვის 32,000 ლარია გაწერილი, თუმცა, რაში დაიხარჯება აღნიშნული თანხა, ამ ეტაპზე გარკვეული არაა.

როგორც მუნიციპალიტეტის საკრებულოს თავმჯდომარე ოლეგ სანდროშვილი გვიხსნის, აღნიშნული თანხა გასული წლის ნაშთია: „გასულ წელს ცენტრალური ბიუჯეტიდან გამოყოფილი თანხიდან დარჩა. შარშან დაგეგმილი იყო მეორე ეტაპის განხორციელებაც და თუ ისევ გაიწერებოდა თანხა რაბათის რეაბილიტაციისთვის, ამ 32,000-ს დაემატებოდა“.

მისი თქმით, თუ რაბათში რაიმე პროექტის განხორციელება დაიგეგმება, აღნიშნული თანხა მისთვის გაიწერება. თუმცა, ამ ეტაპზე ადგილობრივი ბიუჯეტიდან რაბათის რეაბილიტაციისათვის დაგეგმილი არაფერია. ამ მიმართულებით, პროექტები არც რეგიონული განვითარებისა და ინფრასტრუქტურის სამინისტროში გაუგზავნიათ.

სანდროშვილი ამბობს, რომ გასულ წელს რესურსების ძირითადი ნაწილი მხოლოდ ციხის რეაბილიტაციისთვის იყო გაწერილი, ამის გამო ბევრი მნიშვნელოვანი პრობლემა მოუგვარებელი დარჩა. ამიტომ წელს აქცენტი ქალაქის შიდა გზებსა და სოფლებზე გაკეთდა.
კითხვაზე, შესაძლოა თუ არა მომავალ წელს გაგრძელდეს რაბათის რეაბილიტაცია, სანდროშვილი გვპასუხობს, რომ ამაზე ჯერ პასუხი არ აქვს: „ვერ ვივარაუდებ. ყოველწლიურად ვითარდება ქვეყანა“.

მისივე თქმით, ადგილობრივი სახსრებით ამ ეტაპზე რაბათის რეაბილიტაციისთვის ვერაფერი დაიგეგმება: „თან არჩევნების გამო 4 თვე ბიუეჯტში ცვლილებების შეტანა არ შეგვიძლია“.

რაბათში რესტავრაციის მეორე ეტაპის განხირციელების შესახებ ჯერ-ჯერობით გეგმები არც მთავრობაში აქვთ. როგორც „სამხრეთის კარიბჭესთან“ რეგიონული განვითარებისა და ინფრასტრუქტურის მინისტრმა დავით ნარმანიამ განაცხადა: „ამ მიამრთლებთ პროექტები ამ ეტაპზე გაწერილი არაა“.

[თამუნა უჩიძე, ახალციხე]