სისხლის სამართლის საქმე, რომელსაც ვანო მერაბიშვილი რაბათში ობიექტების დაკეტვას უკავშირებს

პირველი იანვრის ღამეს ახალი წლის აღსანიშნავად მოწყობილი საღამო რესტორან ”მესხურ ოდაში” ჩხუბის გამო ჩაიშალა. რესტორნის მენეჯერს სოფო გორდაძესა და სტუმრად მყოფ ნინო მარტინენკოს შორის მსუბუქი შელაპარაკება ჯერ სიტყვიერ შემდეგ კი ფიზიკურ შეურაცხყოფაში გადაიზარდა. ამავე ღამეს საახალწლო ღონისძიებაზე იმყოფებოდა მხარის რწმუნებული სამცხე-ჯავახეთში ივანე წიკლაური და ასევე აპარატის თანამშრომელი და ახალცხიის მუნიციპალიტეტის ყოფილი გამგებელი გელა დემეტრაძეც.

როგორც დაზარალებული ნინო მარტინენკო ”სამხრეთის კარიბჭესთან” საუბარში ყვება, შელაპარაკება მის ძმას ნიკოლოზ მარტინენკოსა და რესტორნის მენეჯერს სოფო გორდაძეს შორის მოხდა: ”ჩემმა ძმამ მოითხოვა სიმღერა და ამაზე სოფომ შეიგინა. მივედი და ვთხოვე გაჩერებულიყვნენ, რომ ეს ყველაფერი ჩხუბში არ გადაზრდილიყო. როგორც ჩანს, სოფო სხვა რაღაცაზეც იყო გაბრაზებული და ამის თქმის შემდეგ თმებში მწვდა. ატყდა ჩხუბი”.

რესტორანში ჩხუბი 20 წუთზე მეტ ხანს გრძელდებოდა. ერთ მხარეს გორდაძე, ლალი გოგუა, ზურაბ გაბადაძე და რომან აფციაური, მეორე მხარეს კი - გელა ძამუნაშვილი და ნინო მარტინენკოს ძმა, ნიკოლოზ მარტინენკო ჩხუბობდნენ.

ახალი წლის ღამეს მომხდარს ახალციხის რაიონული პროკურატურა იძიებს. ბრალდებულის პირველი წარდგენისა და აღკვეთი ღონისძიების შესახებ პირველი პროცესი ახალციხის რაიონულ სასამართლოში 22 თებერვალს ჩატარდა. მხარეებს გირაოს სახით 2000 – 2000 ლარის გადახდა დაეკისრათ. მომავალი პროცესი კი 15 აპრილს გაიამრთება.

მანამდე კი საქართველოს ყოფილი პრემიერ-მინისტრი და ნაციონალური მოძრაობის ”გენერალური მდივანი” ვანო მერაბიშვილი სოციალური ქსელით 'რაბათის კომპლექსში' დახურული ობიექტების თემას კიდევ ერთხელ გამოეხმაურა. მერაბიშვილმა საკუთარ ფეისბუკის გვერდზე დაწერა, რომ
რესტორან „მესხური ოდის” მენეჯერს სოფო გორდაძეს და 3 მიმტანს პროკურატურა ჯგუფურად წინასწარ ორგანიზებულ თავდასხმაში ადანაშაულებს და სამცხე-ჯავახეთის გუბერნატორ ვანო წიკლაურის წინააღმდეგ ჩვენების მიცემას აიძულებს.

ზურაბ გაბადაძე, რომელიც „მესხური ოდის” უფროსი მიმტანია ამბობს, რომ მის შემთხვევაში ზეწოლას ადგილი არ ჰქონია: ”მე ნაკლებად ვაინტერესებდი იქ ვინმეს, სოფოს კი დააძალეს, რომ ჩვენება გუბერნატორის წინააღმდეგ მიეცა”.

”სამხრეთის კარიბჭესთან” სატალეფონო საუბარში სოფო გორდაძე მოკლე კომენტარით შემოიფარგლა: ”დიახ ვადასტურებ, რომ ჩემზე ზეწოლას ჰქონდა ადგილი”.

ის, რომ ჩხუბში მხარის გუბერნატორი და ყოფილი გამგებელი ნამდვილად იყვნენ ჩართული, დაზარალებული მარტინენკო და ასევე ნიკოლოზ მარტინენკოსა და გელა ძამუნაშვილის ადვოკატი ბიჭიკო მოდებაძეც ადასტურებს.

”გუბერნატორი ჩვენს წინააღმდეგ ჩხუბობდა”, - ამბობს მარტინენკო და ამატებს, რომ გამოძიების პროცესში მასზე რაიმე ტიპის ზეწოლას ადგილი არ ჰქონია.

მოდაბაძის თქმით, გამოძიების დასრულებამდე რაიმეს მტკიცება ძნელია, თუმცა, ის რომ წიკლაურისა და დემეტაძის მხრიდან წვრილმანი ხულიგნობა მაინც გამოიკვეთება, ეჭვი არ ეპარება.

”ზეწოლაზე საუბარი კარგი იციან! ჩემი დაცვის ქვეშ მყოფების შემთხვევაში არანაირი ზეწოლა არ ყოფილა”, - აცხადებს მოდებაძე.

სამცხე-ჯავახეთის ოლქის პროკურორი გიორგი პაპუაშვილი მერაბიშვილის განცხადებას ჭორაობას უწოდებს და ამბობს, რომ გამოძიების ინტერესებიდან გამომდინარე საქმის დასრულებამდე კომენტარს პროკურატურაში არ გააკეთებენ: ”ფეისბუქეზე ასეთ არაობიექტურ ინფორმაციას იმიტომ ავრცელებენ, რომ მათ ინფორმაციის ნაკლებობა აქვთ. ბუნებრივია, ამ ჭორებს ვერ ავყვებით”.

მომხდარის შესახებ ივანე წიკლაურმა და გელა დემეტრაძემ ”სამხრეთის კარიბჭესთან” კომენტარის გაკეთება არ ისურვეს. დემეტრაძემ მიზეზად მოუცლელობა დაასახელა, წიკლაურმა კი განაცხადა, რომ ამის შესახებ საუბარი არ სურს.

მომავალი სასამართლო პროცესი 15 აპრილს გაიმართება.

[თამუნა უჩიძე, ახალციხე]