ვანო მერაბიშვილი: რაბათის დაცარიელების ერთ-ერთი მთავარი მიზეზი პროკურატურის მიერ აღძრული სისხლის სამართლის საქმეებია

მერაბიშვილი წერს, რომ პირველი შთაბეჭდილება რაც „რაბათ“-ის კომპლექსის დათვალიერების შემდეგ დარჩა, იყო განცდა, რომ ადგილი, რომელიც სულ რამდენიმე თვის წინ ტურისტებისთვის ერთ-ერთი ყველაზე მიმზიდველი სანახაობა იყო, დღეს ფაქტობრივად „მკვდარ ქალაქად“ არის ქცეული. კომპლექსში მოქმედი ობიექტებიდან (კაფეები, მაღაზიები, ბანკი, აფთიაქი, ღვინის მარანი...) დღეს მხოლოდ ერთი რესტორანი ფუნქციონირებს, რომლის მენეჯერსა და სამ თანამშრომელსაც პროკურატურა ჯგუფურად წინასწარ ორგანიზებულ თავდასხმაში ადანაშაულებს და სამცხე-ჯავახეთის გუბერნატორის ვანო წიკლაურის წინააღმდეგ ჩვენების მიცემას აიძულებს.

- ’დღეს სისხლის სამართლის საქმე არის აღძრული ადგილობრივი მუნიციპალიტეტის ყოფილი გამგებლის და მისი თანამშრომლების წინააღმდეგ, ხოლო დახურული ობიექტების წარმომადგენლებს დაკითხვაზე მოუწიათ მისვლა და იმის ახსნა, თუ რატომ სარგებლობდნენ ისინი შეღავათიანი პირობებით, რომლის მიხედვითაც მათ 2013 წლის მაისამდე იჯარის და კომუნალური მომსახურების გადასახადების გადახდა არ უწევდათ.

რაც შეეხება ერთადერთ დარჩენილ რესტორანს „მესხური სახლს“, მის მენეჯერს სოფო გორდაძეს და 3 მიმტანს პროკურატურა ჯგუფურად წინასწარ ორგანიზებულ თავდასხმაში ადანაშაულებს და სამცხე-ჯავახეთის გუბერნატორ ვანო წიკლაურის წინააღმდეგ ჩვენების მიცემას აიძულებს.

ის ფონი, როდესაც პროკურატურას სისხლის სამართლის საქმეები აქვს აღძრული ადგილობრივი გამგებლის, გამგეობის თანამშრომლების და რესტორნის მომსახურე პერსონალის წინააღმდეგ და დაიკითხა კომპლექსში მომუშავე სავაჭრო ობიექტების ყველა მენეჯერი, ჩემი აზრით წარმოადგენს „რაბათ“-ის კომპლექსში ობიექტების დახურვისა და ამ ერთ-ერთი ულამაზესი ადგილის ტურისტებისგან დაცარიელების მთავარ მიზეზს”, - წერს ვანო მერაბიშვილი.

რასისხლის სამართლის საქმეზე საუბრობს ვანო მერაბიშვილი. რა მოხდა პირველი იანვრის ღამეს ახალციხის ციხეში ერთ-ერთ რესტორანში, ნამდვილად ფიგურირებენ თუ არა ამ საქმეში ყოფილი გამგებელი და მხარის გუბერნატორი, - დეტალებს ”სამხრეთის კარიბჭე” იკვლევს და მოგვაინებით შემოგთავაზებთ.

[ნინო ნარიმანიშვილი, ახალციხე]