სამცხე–ჯავახეთში სუს–ის ანალიტიკური სამსახურის უფროსი სამსახურიდან გაათავისუფლეს

სახელმწიფო უსაფრთხოების სამსახურის სამცხე–ჯავახეთის რეგიონული სამმართველოს ანალიტიკური სამსაუხრის უფროსი ბონდო ლომსაძე 17 მარტიდან აღნიშნულ პოზიციაზე აღარ მუშაობს.

„კადრების განკარგულებაში გადავიყვანეთ“, – აცხადებენ სახელმწიფო უსაფრთხოების სამსახურის საზოგადოებასთან ურთიერთობის სამსახურში.
ბონდო ლომსაძე წლების განმავლობაში ახალქალაქში მუშაობდა.

„ჩემს გამო გაუშვეს ჩემი ძმა სამსახურიდან. ამ მთავრობის წინააღმდეგ გამოვდივარ ყოველთვის და იმიტომ. სულ მაფრთხილებდა, გაჩუმდი ხმას ნუ იღებ, ამ მთავრობას ვერ მოერევიო“, – ამბობს ბონდო ლომსაძის ძმა გიორგი ლომსაძე.

შეკითხვაზე, რაში გამოიხატებოდა მისი წინააღმდეგობა ამ მთვრობისადმი, გიორგი ლომსაძე გვპასუხობს: „ხშირად ვაშეარებდი ფესიბუქში სამმართველოს თანამშრომლების მანქანებს, არასწორად რომ ჰყავდათ გაჩერებული, მაგალითად, სამმართველოს უფროსის თემურ კალანდაძის მანქანას და მერე კომენტარებსაც ვწერდი“.

გიორგი ლომსაძე სოციალურ ქსელში 11–12 მარტს ბათუმში განვითარებული მოვლენების დროსაც აქტიურობდა: „ვწერდი, რომ ასეთი მუხტი ყველა ქალაქში მინდა, ამ მთავრობის წინააღმდეგ–მეთქი“.

გიორგი ლომსაძე წლების წინ ჯერ საპატრულო პოლიციაში, შემდეგ კი სამაშველო სამსახურში მუშაობდა. თუმცა, როგორც თავად ამბობს, ბოლოს სამუშაო ადგილი იმის გამო დაატოვებინეს, რომ „ერთიანი ნაციონალური მოძრაობის“ წარმომადგენლების აქციაზე იყო: „ვანოს მხარდამჭერ აქციაზე ვიყავი, ფოტოები გადამიღეს. ამის გამო სამაშველოდან გამომიშვეს. მერე „სამხრეთის კარიბჭეს“ ინტერვიუ მივეცი ამის შესახებ და ჩემმა ძამამ ბოლოს მაშინ გამაფრთხილა გაჩუმდიო“.

შეკითხვაზე, რატომ უკავშირებს საკუთარ თავსა და პრესასთან, ან სოციალურ ქსელში აქტიურობას, ბონდო ლომსაძის სამსახურიდან დათხოვას, გიორგი ლომსაძე გვპასუხობს: „ეგ ისეთი სამსახურია, სხვა პრობლემა რომ ყოფილიყო, კი არ გამოუშვებდნენ, დაიჭერდნენ. უშიშროებაში თანამრომლებს ასე მარტივად არ ათავისუფლებენ. მთავრობა რომ შეიცვალა, მაშინაც კი არავინ შეუცვლიათ, რადგან ეს ადამიანები დიდ და მნიშველოვან ინფრომაციას ფლობენ“.

მისი თქმით, ამჟამად მას ძმასთან ურთიერთობა აღარ აქვს: „17მარტს გამოუშვეს სამსახურიდან, ჩემ დაბადების დღეზე. არადა სამი შვილი ჰყავს, უფროსი წელს სკოლას ამთავრებს, პატარა კი მცირეწლოვანია, სახლში მხოლოდ თვითონ მუშაობდა“.

ბონდო ლომსაძე მომხდარზე „სამხრეთის კარიბჭესთან“ არ საუბრობს, როგორც მან სატელეფონო საუბარში განგვიცხადა, შვებულებაშია და სამსახურიდან არ გაუთავისუფლებიათ: „ნუ მოუსმენთ ჩემს ძმას, ის პროვოკატორია“.

ბონდო ლომსაძე უშიშროების სამსახურში 10 წელი მუშაობდა. როგორც მისი ძმა აცხადებს, აღნიშნულ უწყებაში იგი 2007 წელს დასაქმდა.

[თამუნა უჩიძე, ახალციხე]