ხერთვისის ციხესა და მიმდებარე ტერიტორიას რეაბილიტაცია ჩაუტარდება

ხერთვისის ციხის კომპლექსის ტურისტული ინფრასტრუქტურის მოწყობას, მუნიციპალური განვითარების ფონდი, რეგიონული განვითარების მესამე პროექტის (RDP III) ფარგლებში, მსოფლიო ბანკის დაფინანსებით განახორციელებს.

მუნიციპალური განვითარების ფონდს ტენდერი, სამუშაოების შესრულებაზე, მიმდინარე წლის 10 მარტს აქვს გამოცხადებული. წინადადებების მიღება 10 აპრილს სრულდება. ტენდერში გამარჯვებულმა კომპანიამ სამუშაოები ხელშეკრულების გაფორმებიდან 9 თვეში უნდა დაასრულოს.

სატენდერო დოკუმენტაციის თანახმად, პროექტი ითვალისწინებს:

ციხის მიმდებარედ, ასპინძა-ვარძიის ავტომაგისტრალზე ავტოპარკინგის მოწყობას - ორი სამგზავრო ავტობუსისა და ხუთი ავტომანქანისათვის, იქვე ტერიტორიზე მოეწყობა გამწვანებული კუთხე მოსასვენებელი სკამებითა და გარე განათებით, საპირფარეშო (3 წერტილი, მათ შორის უნარშეზღუდულებისათვის) კანალიზაციის სათანადო გამწმენდით;

საფეხმავლო გზის მოწესრიგება-მოწყობას ავტოპარკინგიდან ქვედაციხის კარიბჭის შესასვლელამდე - გათვალისწინებულია გზის საფარის მოწყობა გარემოსთან თავსებადი, კომბინირებული გადაწყვეტით, სხვადასხვა მონაკვეთებში ბეტონის საფარის, ბუნებრივი ნატეხი ქვით მოკირწყვლა.

ხერთვისის ციხის უნიკალური კარიბჭის რესტავრაცია-კონსერვაციას და მის მიმდებარედ არსებული შენობა #1-ის (შენობა საინფორმაციო ცენტრისთვის) და ცოტა მოშორებით მდებარე შენობა #2-ის (შენობა ციხის კომპლექსის ადმინისტრაციისთვის) რეაბილიტაციას.

დოკუმენტაციის მიხედვით, სარესტავრაციოდ გამოიყენება რეგიონისთვის ტრადიციული ბუნებრივი მასალა - ადგილობრივი ქვა და მასთან თავსებადი კირის დუღაბი. გადახურვა მოეწყობა ტრადიციული ბანური გადახურვის სისტემით. ქვედაციხის ტერიტორიაზე, საპროექტო შენობებს შორის მოეწყობა ბილიკები და მოსასვენებელი ბაქანი ბუნებრივი ფლეთილი ქვით გრუნტის ზედაპირზე.

ეს საინტერესოა:

2007 წლის 24 ოქტომბრიდან, ხერთვისი, ვარძიის მონასტერთან ერთად, შეტანილია იუნესკოს მსოფლიო მემკვიდრეობის საცდელ სიაში.

ხერთვისის ციხე(X – XVIII სს.) საქართველოში ერთ-ერთი საუკეთესოდ შემორჩენილი საფორტიფიკაციო ნაგებობაა. ის მდებარეობს სოფელ ხერთვისში ზღვის დონიდან 1126 მეტრზე. ციხე სტრატეგიულად მნიშვნელოვან ადგილზეა აგებული.

ხერთვისის ციხე ციტადელისა და გალავნისაგან შედგება. ციტადელი კლდის ვიწრო თხემს მიუყვება და ჩრდილო-აღმოსავლეთის მხრიდან საკმაოდ მიუდგომელია. ციტადელის შიდა ტერიტორია ბურჯებიანი ზღუდითაა შემოვლებული და რამდენიმე მონაკვეთად იყოფა. ციხის დასავლეთ ნაწილში მცირე ეკლესია და სხვა ნაგებობათა ნაშთებია შემორჩენილი. სამხრეთიდან და ნაწილობრივ აღმოსავლეთიდან ციხეს აკრავს გალავანი, ჩრდილო-დასავლეთით კი არის წყალზე ჩასასვლელი გვირაბი.

[თინათინ ზაზაძე, ასპინძა]