ხერთვისის ციხის რეაბილიტაცია სრულდება

მთავარი → სიახლე, საზოგადოება 19.03.2018

ასპინძაში, ხერთვისის ციხის რეაბილიტაცია სრულდება. განახლებული კომპლექსი დამთვალიერებელს აპრილიდან მიიღებს.

მუნიციპალური განვითარების ფონდში აცხადებენ, რომ უკვე დასრულებულია ვიზიტორთა ცენტრის, საპირფარეშოების და პარკინგის მშენებლობა. რეაბილიტაცია ჩაუტარდა საფეხმავლო გზას, ციხის უნიკალურ კარიბჭეს, მოეწყო გარე განათება.

ხერთვისის ციხეზე 1 500 000 ლარის ღირებულების ტურისტული ინფრასტრუქტურის მოწყობა, გასული წლის ოქტომბრიდან დაიწყო და მარტის ბოლოს უნდა დასრულდეს.

2007 წლის 24 ოქტომბრიდან, ხერთვისი, ვარძიის მონასტერთან ერთად, შეტანილია იუნესკოს მსოფლიო მემკვიდრეობის საცდელ სიაში.

ხერთვისის ციხე(X – XVIII სს.) საქართველოში ერთ-ერთი საუკეთესოდ შემორჩენილი საფორტიფიკაციო ნაგებობაა. ის მდებარეობს სოფელ ხერთვისში ზღვის დონიდან 1126 მეტრზე. ციხე სტრატეგიულად მნიშვნელოვან ადგილზეა აგებული.

ხერთვისის ციხე ციტადელისა და გალავნისაგან შედგება. ციტადელი კლდის ვიწრო თხემს მიუყვება და ჩრდილო-აღმოსავლეთის მხრიდან საკმაოდ მიუდგომელია. ციტადელის შიდა ტერიტორია ბურჯებიანი ზღუდითაა შემოვლებული და რამდენიმე მონაკვეთად იყოფა. ციხის დასავლეთ ნაწილში მცირე ეკლესია და სხვა ნაგებობათა ნაშთებია შემორჩენილი. სამხრეთიდან და ნაწილობრივ აღმოსავლეთიდან ციხეს აკრავს გალავანი, ჩრდილო-დასავლეთით კი არის წყალზე ჩასასვლელი გვირაბი.

[თინათინ ზაზაძე, ასპინძა]