ბაკურიანში საფეხმავლო და ველობილიკის მოწყობა იგეგმება

საფეხმავლო და ველობილიკი დაბა ბაკურიანის ცენტრალურ ნაწილში, წრიული საავტომობილო გზის მიმდებარედ მოწყობა. ბილიკის საერთო სიგრძე 2 721 მეტრი იქნება ხოლო საერთო ფართი - 7000 კვადრატული მეტრი.

პროექტით გათვალისწინებულია 2,2–მეტრი სიგანის საფეხმავლო გზის მოწყობა ასფალტის საფარით და ბაზალტის ბორდიურით, რომელიც ასევე ველოსიპედისტებსაც მოემსახურება. ველო-ბილიკი 1,2 მეტრი სიგანის იქნება და გამოყოფილი იქნება სტაფილოსფერით.

ასევე მოეწყობა 50 საგზაო ნიშანი ლითონის დგამებზე, მათ შორის 10 „პარკირების აკრძალვის“ ნიშანი ყოველ 300 მეტრში, გარდა ამისა, გათვალისწინებულია ასფალტის მონიშვნა, როგორც ფეხით მოსიარულეთა გადასასვლელებზე, ასევე ბილიკზე საველოსიპედო და საფეხმავლო ნაწილების გამოსაყოფად. გამომდინარე იქედან, რომ ბაკურიანი სამთო-სათხილამურო კურორტად ითვლება, ყველა მონიშვნა უნდა იქნას დატანილი ყვითელი საღებავით, ზამთრის პირობებში უკეთესი ხილვადობისთვის.

ასევე, გათვალისწინებულია 8 ადგილას ბილიკის გაფართოვება (1,2mX5, 0m) მოსასვენებელი სივრცის მოსაწყობად, რაც ითვალისწინებს საჩრდილობლის, საპარკო სკამების, ნაგვის ურნების და განათების მოწყობას, ნაგვის ურნები ასევე განთავსდება ბილიკის მთელ პერიმეტრზე. პროექტით ასევე გათვალისწინებულია 27 არსებული ელექტრო ბოძის გადატანა და 11 ახალი ბოძის მოწყობა.

მუნიციპალური განვითარების ფონდმა ბაკურიანში საფეხმავლო და ველო ბილიკის მოსაწყობად ტენდერი 2016 წელის 15 დეკემბერს გამოაცხადა. წინადადებების მიღება 20 იანვარს დაიწყება და 24 იანვარს დასრულდება. ტენდერი 902 300 ლარზეა გამოცხადებული.

[თინათინ ზაზაძე, ბორჯომი]