გაუქმებული დანამატი და შემცირებული პრემია – მერიამ 'ქამარი შემოიჭირა'

მიმდინარე წელს ახალციხის საკრებულოსა და მერიაში სახელფასო დანამატებს აღარ აიღებენ. რაც შეეხება პრემიას, საკრებულოში წლის განმავლობაში ორჯერ, სააღდგომოდ და საახალწლოდ მიიღებენ. მერიაში 2017 წელს პრემია ასევე ორჯერ გაიცემა, თუმცა ერთი პრემიის ოდენობა გაიყოფა ორზე.

„მერიაში ერთი პრემია გავაუქმეთ, ამიტომ რაც დარჩა, იმას გავყოფთ ორზე და ისე ავიღებთ“, – განაცხადა ახალციხის საკრებულოს სხდომაზე მერმა ვლადიმერ ზედგინიძემ.

რასაც საკრებულოს ოპოზიციონერი დეპუტატის ჯიმშერ გოგოლაურის პროტესტი მოჰყვა. იგი იმ დარჩენილი პრემიების ოდენობის გაუქმებასაც ითხოვდა, რაც მიმდინარე წელს საკრებულოში უნდა გაიცეს: „რაც დატოვეთ პრემია საკრებულოში, ან ის რაზე უნდა აიღონ?! ეგეც გააუქმეთ“.

არ დაეთანხმა გოგოლაურს ასევე დეპუტატი ოპოზიციიდან მალხაზ გიქოშვილი: „ასე ჩვენ თავებს ვიმცირებთ, ადამიანს ღირსეული ხელფასი უნდა ჰქონდეს“.

ახალციხის მერიას 2017 წლის ბიუჯეტში ცვლილებების შეტანა და ადმინისტრაციული ხარჯების შემცირება 500 000 ლარით მოუხდა. ეს გასული წლის ბიუჯეტის შესრულებული ნაწილის ოდენობაზე იყო დამოკიდებული. სწორედ ამის გამო ერთ–ერთი მიმართულება, სადაც თანხა დაიზოგა სახელფასო დანამატები და პრემია იყო.

გასულ, 2016 წელს, ახალციხის მერიასა და საკრებულოში, პრემიისა და დანამატის სახით, 400.000 ლარამდე თანხა გაიცა.

უფრო კონკრეტულად, მერიაში პრემია ორჯერ, სააღდგომოდ 65 თანამშრომელზე (57 70 ლარი) და საახალწლოდ 64 თანამშრომელზე (50 884 ლარი) გასცეს, – 108,594 ლარი. დანამატის სახით კი მერიაში 165.433 ლარია გაცემული.

რაც შეხება საკრებულოს, გასულ, 2016 წელს, პრემია აქაც ორჯერ, სააღდგომოდ და საახალწლოდაა გაცემული, – 16 თანამშრომელზე 39.670 ლარი; დანამატის სახით კი, საკრებულოში, 85.397 ლარია გაცემული.

ჯამში, მერიასა და საკრებულოში, გასულ წელს, პრემიის სახით გაცემულია 148.264 ლარი; დანამატის სახით კი, 250 830 ლარი, რაც ჯამში, 399.094 ლარს შეადგენს.

[თამუნა უჩიძე, ნინო ნარიმანიშვილი, ახალციხე]