გაურკვევლობა აუქციონზე გაყიდული შენობების ნუსხაში

ახალციხის მუნიციპალიტეტის სოფელ წინუბნის ცენტრში მდებარე ორსართულიანი კლუბ-ბიბლიოთეკის შენობის პირველი სართული 1997 წლიდან სარქის აღიკიანის საკუთრებაა, თუმცა ის გაყიდულ შენობათა ნუსხაშია მითითებული და 570 000 ლარად შპს ”ინტელ ექსპრეს ჯორჯიამ” იყიდა.

ასევე გაყიდულია კლუბ ბიბლიოთეკის შენობა სოფელ ორალში, თუმცა, აქ ამ დრომდე 15-ზე მეტი ბავშვი სწავლობს.

გაყიდული შენობების სიაშია კლუბ-ბიბლიოთეკის შენობა სოფელ ყულალისშიც, სადაც უკვე 5 წელია რიტუალების სახლი ფუნქციონირებს. შენობა სოფლის მხარდაჭერის პროგრამის ფარგლებში გარემონტდა და მის მოსაწესრიგებლად 17 ათას ლარზე მეტი დაიხარჯა.

ახალციხის მუნიციპალიტეტის გამგეობის ეკონომიკისა და ინფრასტრუქტურის სამსახურის უფროსი თენგიზ ზედგინიძე აცხადებს, რომ გაყიდული შენობების ნუსხაში არც კერძო საკუთრება, არც სკოლა და არც რიტუალების სახლი არ მოხვედრილა. მისი განმარტებით წინუბანში შენობის მხოლოდ მეორე სართული გაიყიდა. ზედგინიძე დაუშვებლად მიიჩნევს აგრეთვე იმას, რომ აუქციონზე გამგეობამ რიტუალების სახლი გაყიდა.

- ”აქ შეცდომაა დაშვებული, ყულალისის ნაცვლად უნდა იყოს მითითებული სოფელი ჯულღა. ყულალისში რიტუალების სახლს აუქციონზე არ გავიტანდით”, - გვითხრა ზედგინიძემ.

ახალციხის მუნიციპალიტეტის ყოფილი გამგებელი ბესიკ ხითარიშვილი კი აცხადებს, რომ აუქციონზე გატანილი სწორედ ყულალისის კლუბ-ბიბლიოთეკის შენობა, ანუ ამჟამინდელი რიტუალების სახლია.

რაც შეეხება, ორალში კლუბის შენობაში მოქმედ სკოლას, ზედგინიძე ამბობს, რომ სოფელს სკოლის შენობა აქვს და აქ დაწყებითი კლასები არაოფიციალურად ფუნქციონირებს.

- ”კულტურის სახლში როგორ შეიძლება სკოლა იყოს?! ყველა სკოლა რაც კი არსებობს დარეგისტრირებულია განათლების სამინისტროში”, - აცხადებს ზედგინიძე.

ახალციხის საგანმანათლებლო რესურსცენტრში აცხადებენ, რომ ორალში სკოლის შენობასთან დაკავიშრებით არანაირი პრობლემა არ არსებობს, თუმცა ის თუ სად ფუნქციონირებს ამჟამად დაწყებითი კლასები, ან ვინ გაყიდა შენობა, სადაც 15-მდე ბავშვი სწავლობს არ იციან.

პამაჯის ტერიტორიული ორგანის რწმუნებული კარლენ კარახალიანი გვიხსნის, რომ სოფელს ახლად აშენებული 4-ოთახიანი სკოლა აქვს, თუმცა შენობა ამ დრომდე ცარიელია.

- ”თბილისიდან დამირეკეს, არ ვიცი ვინ იყო, მითხრეს შენობა უდნა დაცალოთ, ჩვენიაო. ამიტომ ამ დღეებში დაწყებითი კლასები ახალ შენობაში გადავა”, - ამბობს კარახალიანი.

მისი თქმით, სკოლა სოფელს ფირმა ”ორიზონმა” აუშენა: ”ამ დღეებში განათლების სამინისტროს წარმომადგენლებიც მოვლენ და შენობა მათ ბალანსზე გადავა”.

რაც შეეხება სოფელ ყულალისში გაყიდულ რიტუალების სახლს, რწმუნებული ამბობს, რომ ამის შესახებ არაფერი იცის. ამ დრომდე ამ შენობის დაცლასთან დაკავშირებით კარახალიანს არავინ დაკავშირებია. მყიდველს ჯერ არც წინუბნის ცენტრში თითქმის დანგრეული კლუბ-ბიბლიოთეკის მეორე სართული მოუკითხავს.

[თამუნა უჩიძე, ახალციხე]