ახალციხის მერია ოთხმა თანამშრომელმა დატოვა

ახალციხის მერის დისშვილმა გიორგი ანდღულაძემ დაკავებული პოზიცია დატოვა. იგი ეკონომიკური განვითარების, ქონების მართვისა და სტატისტიკის განყოფილების უფროსის მოვალეობის შემსრულებელი იყო.

„28 თებერვალს დავწერე განცხადება და წამოვედი“, – აცხადებს ანდღულაძე.

რაც შეეხება შეკითხვას რა გახდა ამის მიზეზი, გვპასუხობს, რომ ამაზე კომენტარს არ გააკეთებს.

გიორგი ანდღულაძე მერიაში მას შემდეგ დასაქმდა, რაც ქალაქის მერის უფლებამოსილების შესრულებას ვლადიმერ ზედგინიძე შეუდგა.

ახალი მერის მისვლის შემდეგ დაიწყო მუშაობა ინფრასტრუქტურის სამსახურში არქიტექტორად დავით ჯაფარიძემაც. თუმცა პოზიციის დატოვება მან ანდღულაძეზე ადრე გადაწყვიტა.

„28 თებერვლამდე დავწერე განცხადება“, – ამბობს ჯაფარიძე და მიზეზებზე საუბარს ისიც თავს არიდებს – „ახლა ვერ დაგელაპარაკებით ამაზე“.

მერია დატოვეს ძველმა თანამშრომლებმაც.

პირველ თებერვალს პირადი განცხადების საფუძველზე გათავისუფლდა მთავარი სპეციალისტი კადრებისა და საქმის წარმოების საკითხებში ია აბულაძე.

„საკუთარ ბიზნესს მინდა მივხედო, ეს იყო მიზეზი, სხვა პრობლემა არაფერი ყოფილა“, – ამბობს აბულაძე, რომელიც მერიაში აღნიშნულ პოზიციაზე სამი წელი მუშაობდა.

ექვსწლიანი მუშაობის შემდეგ მერიის დატოვების შესახებ გადაწყვეტილება მიიღო შესყიდვების განყოფილების უფროსმა მანანა ბალიაშვილმაც: „სხვა სამსახურში დავიწყე მუშაობა, „ვორლდ ვიჟენში“ გადავედი, მიზეზი მხოლოდ ეს იყო“, – აცხადებს იგი.

ახალციხის მერიაში განხორციელებული საკადრო ცვლილებების შესახებ კომენტარს ჯერ კიდევ არ აკეთებენ.

შეგახსენებთ, რომ ახალციხის მერიაში, მას შემდეგ, რაც ქალაქის ახალ არჩეულმა მერმა ვლადიმერ ზედგინიძემ მუშაობა დაიწყო, საკადრო ცვლილებების განხორციელება დაიწყო. თუმცა, მესამე თვეა ამ თმაზე ქალაქის მერი არ საუბრობს.

[თამუნა უჩიძე, ახალციხე]