საჯარო დაწესებულებებში მოწევა აიკრძალება

საქართველოს პარლამენტში წარდგენილი კანონპროექტის მიხედვით, რომელიც „თამბაქოს კონტროლის შესახებ“ კანონში ცვლილებებს ითვალისწინებს, სხვადასხვა საზოგადოებრივ და საჯარო სივრცეებში მოწევის სრულად ან ნაწილობრივ აკრძალვა 2017 წლის 1 ივლისიდან იწყება.

2017 წლის 1 ივლისამდე საჯარო დაწესებულებების, კაფე-ბარების, რესტორნებისა და საზოგადოებრივი კვების ობიექტების, კაზინოების, სილამაზის სალონების, მაღაზიების და სავაჭრო ობიექტების შენობა-ნაგებობებში დასაშვებია როგორც მოწევის სრული აკრძალვა ისე სპეციალური მოსაწევი ადგილის (ადგილები) გამოყოფა, რომელიც უნდა აკმაყოფილებდეს შემდეგ კრიტერიუმებს:

• არ უნდა იკავებდეს დაწესებულების საერთო ფართის 20%-ზე მეტს;
• სრულად (კედლებით) გამიჯნული უნდა იყოს დაწესებულების სხვა ნაწილებისაგან/ტერიტორიისაგან;
• უნდა ჰქონდეს ვენტილაცია ან ღია სივრცეში გამავალი ფანჯარა.

2018 წლის 1 იანვრამდე კერძო ოფისების, ქარხანა-ფაბრიკების, საამქროების, საწყობების, ტერმინალების და სხვა მსგავსი დაწესებულებების შენობა-ნაგებობაში დასაშვებია როგორც მოწევის სრული აკრძალვა ისე სპეციალური მოსაწევი ადგილის (ადგილები) გამოყოფა, რომელიც უნდა აკმაყოფილებდეს შემდეგ კრიტერიუმებს:

• არ უნდა იკავებდეს დაწესებულების საერთო ფართის 20%-ზე მეტს;
• სრულად (კედლებით) გამიჯნული უნდა იყოს დაწესებულების სხვა ნაწილებისაგან/ტერიტორიისაგან;
• უნდა ჰქონდეს ვენტილაცია ან ღია სივრცეში გამავალი ფანჯარა.

ასევე, მოწევა იკრძალება საზოგადოებრივ ტრანსპორტში, მათ შორის, ავტობუსში, სამარშრუტო ტაქსში, არასამარშრუტო ტაქსში, საჰაერო ხომალდში, მეტროპოლიტენში, მატარებელში, ტრამვაისა და ტროლეიბუსში, გემზე, კატერებსა და სხვა სანაოსნო საშუალებებზე.

პროექტით იკრძალება თამბაქოს ნაწარმის, მისი აქსესუარების და მოხმარებისთვის განკუთვნილი მოწყობილობების განლაგება ვიტრინებზე, ვიტრაჟებზე, დახლზე, თაროზე ან ნებისმიერი სხვა სახით იმგვარად, რომ იგი ხილვადია ობიექტის შიგნიდან ან გარედან.

[sknews.ge]