სოციალური მეწარმეობით დაინტერესებულ სტუდენტებს სემინარი ჩაუტარდათ

სემინარზე ახალგაზრდები სოციალური მეწარმეობის კონცეფციასა და წარმატებული სოციალური საწარმოების მაგალითებს გაეცნენ.

სემინარი გაიმართა ყოველწლიური სტუდენტური კონკურსის ფარგლებში "სტუდენტები სოციალური მეწარმეობის მხარდასაჭერად".

კონკურსი 2012 წლის შემდეგ იმართება, თუმცა წელს პირველად - საქართველოს მასშტაბით. 2017 წელს კონკურსი ორგანიზდება ევროკავშირის დაფინანსებით მიმდინარე პროექტის ფარგლებში "სოციალური მეწარმეობა - ინოვაციური მიდგომა ეკონომიკური და სოციალური ცვლილებებისათვის".

კონკურსის მიზანია ახალგაზრდებში სოციალური მეწარმეობის პოპულარიზაცია და არსებული სოციალური საწარმოების გაძლიერება.

კონკურსის ფარგლებში, ახალციხეში, ბათუმში, ქუთაისსა და თბილისში დაიგეგმა სემინარები და გაცნობითი შეხვედრები სოციალური მეწარმეობის თემაზე.

კონკურსში მონაწილეობის მიღება შეუძლიათ საქართველოს აკრედიტირებული უმაღლესი სასწავლებლების სტუდენტებს, რომლებიც ირიცხებიან ბაკალვრიატის ან მაგისტრატურის ნებისმიერ სასწავლო პროგრამაზე და კურსზე.

კონკურსი რამდენიმე ეტაპად იმართება და მოიცავს სტუდენტებისთვის როგორც თეორიული ცოდნის მიწოდებას სოციალური მეწარმეობის თემასთან დაკავშირებით, ისე პრაქტიკულ ღონისძიებებს.

კონკურსში მონაწილეობას შერჩეული 12 გუნდი მიიღებს.

კონკურსის ფორმატი არსებული სოციალური საწარმოს პრობლემური ამოცანის გადაწყვეტას გულისხმობს. 12 გუნდიდან შეირჩევა 4 საუკეთესო და თითოეული მათგანი მიიღებს 1500 ლარიან დაფინანსებას მათი თეორიული პროექტების პრაქტიკაში განსახორციელებლად. ფინალურ ეტაპზე გამოვლინდებიან ჟიურის რჩეულები და 1 გამარჯვებული სტუდენტური გუნდი.

კონკურსში მონაწილეობა უფასოა და ღონისძიებებით გათვალისწინებულ ხარჯებს დაფარავენ ორგანიზატორები.



[მარიამ ბარძიმაძე, ახალციხე]