შემოდის სტატუსი ‘გოჩა დაბნეულია’ – თალაკვაძე უკონტაქტო პატრულირებას განმარტავს

საქართველოს შინაგან საქმეთა მინისტრის მოადგილის, არჩილ თალაკვაძის განმარტებით, საგზაო მოძრაობის უსაფრთხოების ახალი სისტემის ძირითადი მიზანი ავტოსაგზაო შემთხვევების წინააღმდეგ ბრძოლაა. ამისთვის მოძრაობის სისტემაში არაერთი სიახლეა, მათ შორის, უკონტაქტო პატრულირება.

„შემოგვაქვს უკონტაქტო პატრულირება, რაც ასე მოგვწონს ევროპაში. რატომ არ არღვევენ მოქალაქეები ევროპაში, როდესაც პოლიციელი არ დგას, იმიტომ, რომ მათ იციან, რომ არის შესაძლებლობა უკონტაქტო გზით დააჯარიმოს სახელმწიფომ“, – განაცხადა არჩილ თალაკვაძემ ტელეკომპანია „ჯიდიესის“ გადაცემა 2030–ში სტუმრობისას.

მისი განმარტებით, იქნება სპეციალური GPS რეგისტრატორები, რომლებიც სატელიტის საშუალებით მოძრაობის დარღვევის ზუსტ დროს და ადგილს აღნუსხავს. მონაცემები გადაეცემა პოლიციას და პოლიცია დააჯარიმებს მძღოლს.

„ეს იმოქმედებს ისე, როგორც დღეს მოქმედებს ვიდეოჯარიმა. მხატვრულად რომ ვთქვათ, ვიდეოკამერა ბოძებიდან ჩამოდის და იწყებს მოძრაობას. პროგრამაც კი არის შექმნილი ტელეფონისთვის, რომელიც გაჩვენებთ სად არის სიჩქარის დეტექტორი, დამონტაჟებული – “გოჩა ჩართულია”, “გოჩა გამორთულია”. ჩვენ შემოგვაქვს მობილური დეტექტორები, როდესაც “გოჩამაც” კი არ იცის, ანუ, პროგრამამაც კი არ იცის სად არის ეს დეტექტორი და შემოდის მესამე სტატუსი, “გოჩა დაბნეულია”, ანუ ვთქვათ დღეს ეს დეტექტორი დგას მეხუთე კილომეტრზე, ხვალ მეშვიდეზე და მძღოლებს აქვთ განცდა, რომ სიჩქარის გადაჭარბება ყველგან ისჯება და არა მხოლოდ იმ ბოძებთან, რომელიც მათ დაიმახსოვრეს”, – განაცხადა თალაკვაძემ.

მისი თქმით, ავტოავარიების შედეგად საქართველოში ყოველწლიურად ასობით ადამიანი იღუპება და ათასობით ზიანდება, ამის გამო დაუყოვნებლივ მოქმედებაა საჭირო.

„წლის განმავლობაში ჩვენ ვკარგავთ 600–ზე მეტ მოქალაქეს, რომლებიც იღუპებიან ავარიების დროს და ასევე 10.000–ზე მეტ მოქალაქეს, რომლებიც იღებენს ტრამვას და სახიჩრდებიან. მხოლოდ თბილისში 26 შავი წერტილია, სადაც ავარიების უმტესობა ხდება. პრობლემა გვაქვს მგზავრების გადაყვანის დროს, თქვენ გინახავთ მიკროავტობუსები, რომლებიც ძალიან ჩქარა მოძრაობენ და რისკს უქმნიან მგზავრებს. ეს არის კოლოსალური დანაკარგი ჩვენი საზოგადოებისთვის“, – განაცხადა არჩილ თალაკვაძემ.

[ნინო ნარიმანიშვილი, ახალციხე]