“რუსთავი 2”–მა აქციის დაწყებასთან ერთად მაუწყებლობაც განაახლა

რუსთაველის გამზირზე, პარლამენტის წინ სამაუწყებლო კომპანია ”რუსთავი 2”-ის მხარდამჭერი აქცია 15:00 საათისათვის დაიწყო. ამავე პერიოდიდან, არხმა პროტესტის ნიშნად შეწყვეტილი მაუწყებლობა განაახლა. იგი „მარაოსთან“ და “COMEDY არხთან” ერთად, აქციის პირდაპირ ტრანსლაციას ახორციელებს.

რუსთაველის გამზირზე, აქციის მონაწილეებს „რუსთავი 2“–ის ჟურნალისტები მიმართავენ.

„ამ წუთიდან რუსთავი2 ისევ ჩაირთო, რაც იმას ნიშნავს, რომ ეს არხი აღარ უნდა გამოირთოს,დღეს ჩვენ ერთად უნდა ვუთხრათ ამ ხელისუფლებას, რომ ვერასოდეს ვერ შეეხებით ამ ქვეყანაში სიტყვის თავისუფლებას“–განაცხადა აქციაზე მიმართვისას, „რუსთავი2“-ის გენერალური დირექოტირს პირველმა მოადგილემ ზაალ უდუმაშვილმა.

აქციას ასევე, თავიანთ მხარდამჭერებთან ერთად „ნაციონალური მოძრაობისა“ და „ევროპული საქართველოს“ ლიდერები შეუერთდნენ, რომლებმაც პარლამენტის შენობამდე, ვარდების მოედნიდან და მთავრობის ადმინისტრაციიდან საპროტესტო მსვლელობა გამართეს.

ტელეკომპანიის მხარდამჭერ აქციაში სამოქალაქო სექტორისა და სხვადასხვა მედიასაშუალების ჟურნალისტებიც მონაწილეობენ.

აქციის გამო, რუსთაველის გამზირზე საავტომობილო მოძრაობა შეჩერებულია. ტერიტორიაზე მობილიზებულნი არიან სამართალდამცველებიც.

შეგახსენებთ, რომ „რუსთავი 2“–ის მხარდამჭერ აქციას, სამცხე–ჯავახეთიც შეუერთდა.დილიდან დედაქალაქში „ევროპულის საქართველოს", ასევე „ნაციონალური მოძრაობის“ 500–მდე მხარდამჭერი გაემგზავრა.

აქციის ორგანიზატორების განცხადებით, ხელისუფლების ზეწოლით უზენაესი სასამართლო აპირებს ტელეკომპანია ”რუსთავი 2” - ის საწინააღმდეგო გადაწყვეტილება გამოიტანოს.

[sknews.ge]